മനാമ: പുതിയ അധ്യയനവര്‍ഷത്തില്‍ കോവിഡ് മാനദണ്ഡങ്ങള്‍ പാലിച്ച്‌ രാജ്യത്തെ മുഴുവന്‍ വിദ്യാഭ്യാസ സ്ഥാപനങ്ങളും പ്രവര്‍ത്തിക്കാന്‍ കഴിഞ്ഞ ദിവസം ചേര്‍ന്ന മന്ത്രിസഭ യോഗം തീരുമാനിച്ചു.
സ്കൂള്‍ തുറക്കുന്നതുമായി ബന്ധപ്പെട്ട ഒരുക്കം വിദ്യാഭ്യാസമന്ത്രി വിശദീകരിച്ചു. വിദ്യയും വിജ്ഞാനവും പുതിയ കഴിവുകളും കോര്‍ത്തിണക്കി ഭാവി തലമുറ രാജ്യത്തിന് കരുത്ത് പകരുന്നവരായിരിക്കട്ടെയെന്ന് മന്ത്രിസഭ ആശംസിച്ചു.
രണ്ട് ഡോസ് കോവിഡ് പ്രതിരോധ വാക്സിന്‍ സ്വീകരിച്ച 40 വയസ്സിന് മുകളിലുള്ളവരില്‍ 80 ശതമാനം പേരും ബൂസ്റ്റര്‍ ഡോസ് സ്വീകരിക്കാന്‍ മുന്നോട്ടുവന്നതിനെ മന്ത്രിസഭ അഭിനന്ദിച്ചു. പ്രതിരോധ പ്രവര്‍ത്തനങ്ങളില്‍ ജനങ്ങളുടെ സഹകരണം പ്രശംസനീയമാണെന്നും യോഗം വിലയിരുത്തി.
അഫ്ഗാനിസ്താനിലെ കാബൂള്‍ വിമാനത്താവളത്തിന് സമീപമുണ്ടായ രണ്ട് തീവ്രവാദ ആക്രമണങ്ങളെ മന്ത്രിസഭ ശക്തമായി അപലപിച്ചു. അഫ്ഗാനില്‍ സമാധാനം സ്ഥാപിക്കാനും പൗരന്മാര്‍ക്ക് മെച്ചപ്പെട്ട ജീവിതം ഉറപ്പാക്കാനും അന്താരാഷ്ട്ര സമൂഹത്തിന്‍െറ ജാഗ്രതയുണ്ടാവണമെന്നും അഭിപ്രായപ്പെട്ടു.
വിവിധ മന്ത്രിമാരുടെ വിദേശ സന്ദര്‍ശനങ്ങളെക്കുറിച്ചും അവര്‍ പങ്കെടുത്ത യോഗങ്ങളുടെ റിപ്പോര്‍ട്ടും സഭയില്‍ അവതരിപ്പിച്ചു.
കിരീടാവകാശിയും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ ഖലീഫയുടെ അധ്യക്ഷതയില്‍ ഗുദൈബിയ പാലസിലായിരുന്നു കാബിനറ്റ് യോഗം.
