കോഴിക്കോട്: കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങള്ക്കെതിരേ പീഡനപരാതി. കണ്ണൂര് സ്വദേശിനിയായ യുവതിയാണ് പരാതിയുമായി രംഗത്തുവന്നത്. കോഴിക്കോട് വനിതാസ്റ്റേഷനില് നല്കിയ പരാതിയിലാണ് വെള്ളിയാഴ്ച രാത്രിയോടെ കേസെടുത്തു. രണ്ടാംഭര്ത്താവുമായുള്ള കുടുംബപ്രശ്നം പരിഹരിക്കാമെന്ന് വാഗ്ദാനം നല്കി രണ്ടുവര്ഷത്തിനിടയില് പലതവണയായി പീഡിപ്പിച്ചതായാണ് യുവതിയുടെ പരാതി.
ഐ.പി.സി. 376-ാം വകുപ്പ് പ്രകാരമാണ് കേസെടുത്തത്. പരപ്പനങ്ങാടി ആനങ്ങാടിയിലെ ഖാസിയുടെ വീടിനുമുന്നിലെ സന്ദര്ശകര്ക്കുള്ള ഷെഡില്വച്ചാണ് പീഡിപ്പിച്ചതെന്നാണ് യുവതി പൊലീസില് മൊഴി നല്കിയത്. ഖാസിയുടെ ഡ്രൈവറും പീഡിപ്പിച്ചെന്ന യുവതിയുടെ പരാതിയില് ഇയാള്ക്കെതിരേയും കേസെടുത്തിട്ടുണ്ട്.
എന്നാല് കുടുംബ പ്രശ്നം പരിഹരിക്കാന് ശ്രമിച്ച ഖാസിയുമായി യുവതി തെറ്റിയതോടെ പരാതി നല്കിയെന്നാണ് ഖാസിയുമായി ബന്ധപ്പെട്ട വൃത്തങ്ങള് വിഷയത്തില് പ്രതികരിച്ചത്. യുവതിയും ഭര്ത്താവും തമ്മില് ഉണ്ടായ പ്രശ്നങ്ങള് പരിഹരിക്കുന്നതിന് വേണ്ടി നേരത്തെ ഖാസി ഇടപെട്ടിരുന്നു. കുടുംബ പ്രശ്നങ്ങളില് ഒത്ത് തീര്പ്പ് ശ്രമവും ഖാസിയുടെ നേതൃത്വത്തില് നടത്തിയിരുന്നു. എന്നാലിത് ഫലം കണ്ടില്ല. പിന്നാലെ ഖാസിയുമായി യുവതി തെറ്റുകയും പരാതി നല്കുകയുമായിരുന്നുവെന്നാണ് ഖാസിയുമായി ബന്ധപ്പെട്ടവര് വിഷയത്തില് പ്രതികരിച്ചത്.
ആരോപണംഅടിസ്ഥാന രഹിതവും കെട്ടിച്ചമച്ചതാണെന്നും കോഴിക്കോട് ഖാസി ഓഫീസ് അറിയിച്ചു. കുടുംബ പ്രശ്നം പരിഹരിക്കാന് ശ്രമം നടക്കുന്നതിനിടെയാണ് വ്യാജ പരാതിയുമായി യുവതി രംഗത്തെത്തിയതെന്നും ഇത് സമ്മര്ദ തന്ത്രത്തിന്റെ ഭാഗം മാത്രാണെന്നും ഖാസി ഓഫീസ് പ്രസ്താവനയില് അറിയിച്ചു.