കറാച്ചി: പാകിസ്താനിലെ കറാച്ചി സര്വകലാശാലയില് സ്ഫോടനമുണ്ടായത് വനിതാ ചാവേര് പൊട്ടിത്തെറിച്ച്. സ്ഫോടനത്തില് മൂന്ന് ചൈനീസ് പൗരന്മാരുള്പ്പെടെ നാല് പേര് കൊല്ലപ്പെട്ടു. കൊല്ലപ്പെട്ടവരില് രണ്ട് പേര് സ്ത്രീകളാണ്.
കണ്ഫ്യൂഷ്യസ് ഇന്സ്റ്റിറ്റ്യൂട്ടിന് സമീപമാണ് സ്ഫോടനം. നിരവധിപേര്ക്ക് പരിക്കേറ്റിട്ടുണ്ട്. പരിക്കേറ്റവരില് മൂന്നുപേരുടെ നില അതീവ ഗുരുതരമാണ്. ഒരു സ്ത്രീ നടന്ന് വരികയും ഒരു കാര് വളവ് തിരിക്കാന് ശ്രമിക്കുകയും ചെയ്യുന്നതിനിടെ, സ്ത്രീ ചാവേര് പൊട്ടിത്തെറിക്കുന്ന ദൃശ്യങ്ങളാണ് പുറത്ത് വന്നിരിക്കുന്നത്.
വീഡിയോ കാണാം:
കറാച്ചി സര്വകലാശാലയില് ചൈനീസ് ഭാഷ പഠിപ്പിക്കാനായി ചൈന സ്ഥാപിച്ച കണ്ഫ്യൂഷ്യസ് ഇന്സ്റ്റിറ്റ്യൂട്ടിന് സമീപമാണ് സ്ഫോടനം ഉണ്ടായത്. സര്വകലാശാലയിലെ അധ്യാപകരെയും കൊണ്ടു പോകുകയായിരുന്ന വാഹനമാണ് പൊട്ടിത്തെറിച്ചതെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്തു.
കണ്ഫ്യൂഷ്യസ് ഇന്സ്റ്റിറ്റ്യൂട്ടിന് ഡയറക്ടര് അടക്കം മൂന്ന് ചൈനീസ് പൗരന്മാരും പാകിസ്ഥാന് സ്വദേശിയായ ഡ്രൈവറുമാണ് കൊല്ലപ്പെട്ടതെന്ന് സര്വകലാശാല വക്താവ് പറഞ്ഞു. മറ്റ് രണ്ട് ചൈനീസ് പൗരന്മര്ക്ക് പരിക്കേറ്റിട്ടുണ്ട്. സ്ഫോടനത്തിന് പിന്നാലെ സുരക്ഷാ ഉദ്യോഗസ്ഥര് സ്ഥലത്തെത്തി പ്രദേശം ഒഴിപ്പിച്ചു.
സ്ഫോടനത്തിന്റെ ഉത്തരവാദിത്വം ബലൂച്ച് ലിബറേഷന് ആര്മി (ബിഎല്എ) മജീദ് വിഭാഗം ഏറ്റെടുത്തു. സര്വകലാശാല വളപ്പില് വനിത ചാവേര് പൊട്ടിത്തെറിക്കുകയായിരുന്നുവെന്ന് ബിഎല്എ വക്താവ് പറഞ്ഞു. വനിതാ ചാവേറിന്റെ ചിത്രവും ബിഎല്എ വക്താവ് പുറത്തുവിട്ടു.