കോഴിക്കോട്: നടി സുരഭി ലക്ഷ്മി വഴിയരികില്നിന്ന് ആശുപത്രിയില് എത്തിച്ച യുവാവ് മരിച്ചു. പാലക്കാട് പട്ടാമ്ബി വിളയൂര് പഞ്ചായത്തില് വയലശേരി മുസ്തഫ (39) ആണ് മരിച്ചത്. കാണാതായ ഭാര്യയെയും കുഞ്ഞിനേയും അന്വേഷിച്ച് ഇറങ്ങി, ജീപ്പ് ഓടിക്കുന്നതിനിടെ ഹൃദയാഘാതത്തെ തുടര്ന്ന് വഴിയരികില് കുഴഞ്ഞു വീണ മുസ്തഫയെ സുരഭിലക്ഷ്മിയാണ് പൊലീസ് സഹായത്തോടെ ആശുപത്രിയില് എത്തിച്ചത്. കുറച്ചു സമയത്തിനുള്ളില് മരണവും സംഭവിച്ചിരുന്നു. ഈ വിവരം നടിയോ പൊലീസോ അറിഞ്ഞിരുന്നില്ല. ചൊവ്വാഴ്ച രാത്രിയാണ് സംഭവം നടന്നത്.
മെഡിക്കല് കോളേജ് പൊലീസ് സ്റ്റേഷന് പരിധിയിലുള്ള വീട്ടില് നിന്നും മനോദൗര്ബല്യമുള്ള യുവതി കുഞ്ഞിനെയും കൊണ്ട് പുറത്തു പോവുകയായിരുന്നു. എന്നാലിവര് ഏറെ നേരം കഴിഞ്ഞിട്ടും വീട്ടിലേക്ക് തിരിച്ചെത്തിയില്ല. തുടര്ന്ന് ഭര്ത്താവ് ഇളയ കുഞ്ഞിനെയും കൂട്ടി ജീപ്പില് ടൗണില് അന്വേഷിച്ചിറങ്ങി. രണ്ട് സുഹൃത്തുക്കളും കൂടെയുണ്ടായിരുന്നു. എന്നാല് ഇരുട്ടും വരെ തിരഞ്ഞിട്ടും ഇരുവരെയും കണ്ടെത്താനായില്ല. ഒടുവില് പൊലീസില് പരാതി നല്കി വീട്ടിലേക്ക് മടങ്ങി.
ഇതിനിടയില് വഴിയറിയാതെ കുടുങ്ങിയ യുവതിയും കുഞ്ഞും മെഡിക്കല് കോളേജ് പൊലീസ് സ്റ്റേഷനിലെത്തി. സംസാരത്തില് അസ്വഭാവികത തോന്നിയതോടെ ഇരുവര്ക്കും ഭക്ഷണം നല്കി സ്റ്റേഷനില് ഇരുത്തി. യുവതിയുടെ പക്കല് നിന്നും ഭര്ത്താവിന്റെ ഫോണ് നമ്ബര് വാങ്ങി വിളിച്ചു. കാര്യം പറഞ്ഞു കഴിയുമ്ബോഴേക്കും ഫോണ് ഓഫായി. ഒടുവില് ഇളയ കുഞ്ഞിനെയും സുഹൃത്തുക്കളെയും കൂട്ടി ഇയാള് രാത്രി പൊലീസ് സ്റ്റേഷനിലേക്ക് ജീപ്പില് പുറപ്പെട്ടു. രാത്രി 10 മണിയോടെ തൊണ്ടയാട് മേല്പ്പാലത്തിന് താഴെയെത്തിയപ്പോള് നെഞ്ചുവേദന അനുഭവപ്പെട്ട് വാഹനത്തില് കുഴഞ്ഞു വീണു.
ഡ്രൈവിംഗ് അറിയാത്ത സുഹൃത്തുക്കള് ഉടന് വാഹനത്തില് നിന്ന് പുറത്തിറങ്ങി സഹായത്തിന് അഭ്യര്ത്ഥിച്ചുവെങ്കിലും അതുവഴി പോയ വാഹനങ്ങളൊന്നും നിര്ത്താന് കൂട്ടാക്കിയില്ല. തുടര്ന്ന് അതുവഴി പോയ സുരഭി ലക്ഷ്മിയുടെ ശ്രദ്ധയില് ഇവര് പെടുകയും താരം വണ്ടി നിര്ത്തി പൊലീസില് വിവരമറിയിക്കുകയും ചെയ്തു. തുടര്ന്ന് യുവാവിനേയും സുഹൃത്തുക്കളേയും കൂട്ടി മെഡിക്കല് കോളജ് ആശുപത്രിയിലേക്ക് പോയി. യുവാവിനെ ആശുപത്രിയിലാക്കിയ ശേഷം കുഞ്ഞിനേയും കൊണ്ട് സുരഭി പൊലീസ് സ്റ്റേഷനിലെത്തുകയായിരുന്നു.