കൂടത്തായി കൊലക്കേസുകളില് പ്രതിയായ ജോളി ജോസഫിനെതിരെ ഭര്ത്താവ് ഷാജു സക്കറിയ കോഴിക്കോട് കുടുംബക്കോടതിയില് വിവാഹമോചന ഹര്ജി നല്കി.
കോഴിക്കോട് ജില്ലാ ജയിലില് റിമാന്ഡിലാണ് ജോളി. ജയില് സൂപ്രണ്ട് വഴി കോടതി നോട്ടിസ് അയക്കും. ആറു കൊലപാതകക്കേസുകളില് പ്രതിയായ ഭാര്യയുടെ ക്രൂരത ചൂണ്ടിക്കാട്ടിയാണ് ഷാജു വിവാഹമോചനം ആവശ്യപ്പെട്ടത്. തന്റെ ആദ്യഭാര്യയെയും മകളെയും കൊലപ്പെടുത്തിയത് ജോളിയാണെന്നും തന്നെയും കേസില്പെടുത്താനായി വ്യാജമൊഴി നല്കിയെന്നും ക്രൂരമായ കൊലപാതകങ്ങള് നടത്തിയയാളോടൊപ്പം ജീവിക്കാനാകില്ലെന്നും ഹര്ജിയില് പറയുന്നു. വിവാഹമോചന ഹര്ജി കോടതി ഒക്ടോബര് 26ന് പരിഗണിക്കും.
ഷാജുവിന്റെ ആദ്യഭാര്യ സിലിയുടെയും ജോളിയുടെ ആദ്യഭര്ത്താവ് റോയിയുടെയും മരണത്തിനു ശേഷമാണ് 2017ല് ഷാജുവും ജോളിയും പുനര്വിവാഹിതരായത്. സിലിയെയും റോയിയെയും ജോളി വിഷം നല്കി കൊല്ലാകയായിരുന്നെന്നാണ് പിന്നീട് പൊലീസ് കണ്ടെത്തിയത്. ജോളിയുടെ ആദ്യ ഭര്ത്താവ് റോയിയുടെ പിതൃസഹോദര പുത്രനാണ് ഷാജു. ഈ രണ്ടു മരണങ്ങള് കൂടാതെ ഇരുവരുടെയും കുടുംബത്തില് നടന്ന നാലു മരണങ്ങള് കൂടി കൊലപാതകമാണെന്ന് 2019 ഒക്ടോബറില് പൊലീസ് കണ്ടെത്തി. എല്ലാത്തിനും പിറകില് ജോളിയാണെന്നാണ് പൊലീസ് കണ്ടെത്തിയത്.
ജോളിയുടെ ഭര്ത്താവ് കൂടത്തായി പൊന്നാമറ്റം റോയ് തോമസ്, റോയിയുടെ മാതാപിതാക്കളായ ടോം തോമസ്, അന്നമ്മ തോമസ്, അന്നമ്മയുടെ സഹോദരന് എം.എം.മാത്യു മഞ്ചാടിയില്, ഷാജുവിന്റെ ഭാര്യ സിലി, മകള് ആല്ഫൈന് എന്നിവരാണ് 2002 നും 2016 നും ഇടയില് കൊല്ലപ്പെട്ടത്. ഭക്ഷണത്തില് വിഷം കലര്ത്തി നല്കി ജോളി ആറു പേരെയും കൊലപ്പെടുത്തിയെന്നാണ് കേസ്. മരണ സമയത്ത് സംശയമൊന്നും ഇല്ലാതിരുന്നതിനാല് പോസ്റ്റുമോര്ട്ടം ചെയ്യുകയോ കേസെടുക്കുകയോ ചെയ്തിരുന്നില്ല. റോയി തോമസിന്റെ സഹോദരന് നല്കിയ പരാതിയിലാണ് പിന്നീട് അന്വേഷണം നടത്തുന്നതും മൃതദേഹങ്ങള് പുറത്തെടുത്ത് പോസ്റ്റുമോര്ട്ടം ചെയ്യുന്നതും.