ആലപ്പുഴ: വണ്ടാനം ടി.ഡി മെഡിക്കല് കോളജ് ആശുപത്രിയില് രോഗികളുടെ കൂട്ടിരിപ്പുകാര്ക്ക് ആശ്വാസമേകാന് അഞ്ചുകോടി രൂപ ചെലവില് ഹൗസിങ് ബോര്ഡ് ആശ്വാസകേന്ദ്രം നിര്മിക്കുമെന്ന് എച്ച്.
സലാം എം.എല്.എ. ഇതുമായി ബന്ധപ്പെട്ട് ആശുപത്രി കോണ്ഫറന്സ് ഹാളില് ചേര്ന്ന ആലോചന യോഗത്തില് സംസാരിക്കുകയായിരുന്നു അദ്ദേഹം. ആശുപത്രി അങ്കണത്തില് മൂന്നുനിലകളിലായി 15000 ചതുരശ്രയടിയിലാണ് ആശ്വാസകേന്ദ്രം നിര്മിക്കുക. 50 സെന്റ് സ്ഥലമാണ് ഇതിനായി ലഭ്യമാക്കിയത്.
നിര്മാണം സെപ്റ്റംബര് മൂന്നിന് തുടങ്ങും. 10 മാസംകൊണ്ട് പൂര്ത്തിയാക്കും. താഴത്തെ നിലയില് 10 മുറികളും ഒരോമുറിക്കും ശൗചാലയവുമുണ്ടാകും. ഇതോടൊപ്പം 24 കിടക്കകളുള്ള ഡോര്മിറ്ററികളും നിര്മിക്കും. ഒന്നാംനിലയിലും രണ്ടാംനിലയിലുമായി 12 മുറികള് വീതവും ഒപ്പം ശൗചാലയങ്ങളും ഡോര്മിറ്ററികളുമുണ്ടാകും.
ആകെ 72 ഡോര്മിറ്ററികളും 34 മുറികളും ശൗചാലയങ്ങളുമാണ് നിര്മിക്കുക. രോഗികളുടെ കൂട്ടിരിപ്പുകാരില്നിന്നും ബന്ധുക്കളില്നിന്നും മിതമായ നിരക്കിലുള്ള വാടക ഈടാക്കും. വാഹന പാര്ക്കിങ് സൗകര്യവുമുണ്ടാകും. ഹൗസിങ് ബോര്ഡിെന്റ പ്ലാന് ഫണ്ടില്നിന്നുള്ള പണം ചെലവഴിച്ചാണ് നിര്മാണം. രോഗികളുടെ കൂട്ടിരിപ്പുകാര്ക്കും ബന്ധുക്കള്ക്കും ആശുപത്രിയില് താമസിക്കാന് സൗകര്യമില്ലാത്തതിനാല് നിലവില് വരാന്തകളിലും ഇടനാഴികളിലുമായാണ് വിശ്രമസൗകര്യം കണ്ടെത്തിയിരുന്നത്. ഇത് ആശുപത്രിയുടെ പ്രവര്ത്തനത്തെ പ്രതികൂലമായി ബാധിച്ചിരുന്നു.
ജില്ല പഞ്ചായത്ത് പ്രസിഡന്റ് കെ.ജി. രാജേശ്വരി അധ്യക്ഷത വഹിച്ചു. ഹൗസിങ് ബോര്ഡ് എക്സിക്യൂട്ടിവ് എന്ജിനീയര് ജെ. റെക്സ് പദ്ധതി വിശദീകരിച്ചു. മെഡിക്കല് കോളജ് പ്രിന്സിപ്പല് ഡോ. കെ. ശശികല, ബ്ലോക്ക് പഞ്ചായത്ത് പ്രസിഡന്റ് അഡ്വ. ഷീബ രാകേഷ്, ജില്ല പഞ്ചായത്ത് അംഗം പി. അഞ്ജു, ബ്ലോക്ക് പഞ്ചായത്ത് അംഗം അഡ്വ. പ്രദീപ്തി സജിത്ത്, പഞ്ചായത്ത് അംഗം സുനിത പ്രദീപ്, ആശുപത്രി സൂപ്രണ്ട് ഡോ. സജീവ് ജോര്ജ് പുളിക്കല്, ആശുപത്രി ഡെപ്യൂട്ടി സൂപ്രണ്ട് ഡോ. അബ്ദുള് സലാം, ആര്.എം.ഒ ഡോ. നോനാം ചെല്ലപ്പന്, ഹൗസിങ് ബോര്ഡ് അസി. എക്സിക്യൂട്ടിവ് എന്ജിനീയര് സജീവന്, അസി. എന്ജിനീയര് ഹാഷിം എന്നിവര് പങ്കെടുത്തു.