നീല കാറില്‍ തിരിച്ചു കൊണ്ടാക്കിയെന്ന് പറയാന്‍ നിര്‍ബന്ധിച്ചു: തട്ടിക്കൊണ്ടുപോകല്‍ സംഘം കളളമൊഴി നല്‍കാനും അബിഗേല്‍ സാറയെ ഭീഷണിപ്പെടുത്തി; അബിഗേലിന്റെ മൊഴി

കൊല്ലം: തട്ടിക്കൊണ്ടുപോകല്‍ സംഘം കളളമൊഴി നല്‍കാനും അബിഗേല്‍ സാറയെ ഭീഷണിപ്പെടുത്തിയതായി വിവരം. നീല കാറില്‍ തിരിച്ചു കൊണ്ടാക്കിയെന്ന് പറയാന്‍ ഒരു സ്ത്രീ നിര്‍ബന്ധിച്ചുവെന്ന് കുട്ടി പൊലീസിനോട് പറഞ്ഞു. രണ്ട് സ്ത്രീകളും ഒരു പുരുഷനുമാണ് ഉണ്ടായിരുന്നതെന്നും പറയാന്‍ ഉപദേശിച്ചുവെന്നും അബിഗേല്‍ സാറ പൊലീസിനോട് പറഞ്ഞു. കുട്ടിയിപ്പോള്‍ ആശുപത്രിയില്‍ ചികിത്സയിലാണ്. ഇന്ന് ആശുപത്രിയില്‍ തുടര്‍ന്ന് നാളെയേ കുട്ടി വീട്ടിലേക്ക് മടങ്ങൂ.

അതേസമയം, കുട്ടിയെ സുരക്ഷിതമായി തിരിച്ചു കിട്ടിയതില്‍ സന്തോഷമുണ്ടെന്ന് എഡിജിപി എം.ആര്‍ അജിത്കുമാര്‍ പറഞ്ഞു. പൊലീസ് സേനയും മാധ്യമപ്രവര്‍ത്തകരും നാട്ടുകാരും ഉറങ്ങാതെയിരുന്ന് കുഞ്ഞിനെ കണ്ടെത്താന്‍ പരിശ്രമിച്ചുവെന്ന് എഡിജിപി മാധ്യമങ്ങളോട് പ്രതികരിച്ചു.