കൊച്ചി: നഗരമധ്യത്തില്‍ തുണിക്കടയില്‍ തീപിടിത്തം. എറണാകുളം മാര്‍ക്കറ്റ് റോഡിന് സമീപം ഗോപലപ്രഭു റോഡിലുള്ള ജെയ് ശ്രീകൃഷ്ണ എന്ന തുണികളുടെ മൊത്തവ്യാപാര കേന്ദ്രത്തിലാണ് തീപിടിത്തമുണ്ടായത്.
ഇന്നലെ വൈകിട്ട് അഞ്ചോടെയായിരുന്നു സംഭവം. അവധിയായിരുന്നതിനാല്‍ തുണിക്കടയില്‍ ആരുമുണ്ടായിരുന്നില്ല. കടയില്‍ നിന്ന് പുക ഉയരുന്നത് കണ്ട പ്രദേശവാസികളാണ് ക്ലബ് റോഡ് ഫയര്‍ഫോഴ്‌സില്‍ വിവരമറിയിച്ചത്. ഷട്ടര്‍ ഇട്ടിരുന്നതിനാല്‍ അകത്ത് കയറാന്‍ പറ്റിയില്ല. ഷട്ടര്‍ ഉയര്‍ത്താന്‍ ശ്രമിച്ച ഫയര്‍ഫോഴ്‌സ് ഉദ്യോഗസ്ഥര്‍ക്കടക്കം പൊള്ളലേറ്റു.
കടയുടെ കൗണ്ടറില്‍ നിന്നാണ് തീപിടിച്ചത്. തുണികൾ കത്തി നശിച്ചു. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.
