അട്ടപ്പാടി: അട്ടപ്പാടിയില്‍ ആള്‍ക്കൂട്ടം മര്‍ദ്ദിച്ച് കൊലപ്പെടുത്തിയ ആദിവാസി യുവാവ് മധുവിന്റെ കുടുംബത്തെ പോലീസ് ഉദ്യോഗസ്ഥര്‍ സന്ദര്‍ശിച്ചു. പുതിയ സ്‌പെഷ്യല്‍ പബ്ലിക് പ്രോസിക്യൂട്ടറെ നിയമിക്കുന്നതുമായി ബന്ധപ്പെട്ടായിരുന്നു സന്ദര്‍ശനം. അഗളി ഡി.വൈ.എസ്പി ഓഫീസിലെ ഉദ്യോഗസ്ഥരാണ് കുടുംബത്തെ കണ്ടത്. ആദിവാസി സംഘടനകളുമായും സമരസമിതിയുമായും ചര്‍ച്ച നടത്തിയ ശേഷം സ്‌പെഷ്യല്‍ പബ്ലിക് പ്രോസിക്യൂട്ടറുടെ കാര്യത്തില്‍ തീരുമാനം അറിയിക്കാമെന്ന് കുടുംബം ഉദ്യോഗസ്ഥരെ അറിയിച്ചു.
കേസില്‍ സാക്ഷികളെ കൂറുമാറ്റാനുള്ള ശ്രമം നടക്കുന്നതായും കുടുംബം പോലീസിനെ അറിയിച്ചു. കേസില്‍ സ്‌പെഷ്യല്‍ പബ്ലിക് പ്രോസിക്യൂട്ടര്‍ കോടതിയില്‍ ഹാജാരാകാതിരുന്നത് വിവാദമായിരുന്നു. ചൊവ്വാഴ്ച മണ്ണാര്‍ക്കാട് പട്ടികജാതി, പട്ടികവര്‍ഗ കോടതി കേസ് പരിഗണിച്ചപ്പോള്‍ മധുവിന് വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ ഹാജരായിരുന്നില്ല. സ്‌പെഷ്യല്‍ പബ്ലിക് പ്രോസിക്യൂട്ടര്‍ എവിടെയെന്ന് കോടതി ചോദിച്ചിരുന്നു.
ഇതോടെ കുടുംബത്തിന് ഇഷ്ടമുള്ളയാളെ സ്‌പെഷ്യല്‍ പബ്ലിക് പ്രോസിക്യൂട്ടറായി നിയമിക്കുമെന്ന് ഡയറക്ടര്‍ ജനറല്‍ ഓഫ് പ്രോസിക്യൂട്ടര്‍ അറിയിച്ചു. മധു കേസ് നല്ല രീതിയില്‍ മുന്നോട്ടുകൊണ്ടുപോകുമെന്നും സ്‌പെഷല്‍ പബ്ലിക് പ്രോസിക്യൂട്ടര്‍ കോടതിയില്‍ ഹാജരാകാതിരുന്നത് സര്‍ക്കാര്‍ ഗൗരവമായി കാണുമെന്നും മന്ത്രി പി. രാജീവ് അറിയിച്ചിരുന്നു.
