മലപ്പുറം: അയല്‍ ജില്ലകളിലേക്കും കെ.എസ്.ആര്‍.ടി.സി സര്‍വിസുകള്‍ ആരംഭിച്ചതോടെ യാത്രക്കാര്‍ക്ക് ആശ്വാസം. മലപ്പുറത്തുനിന്ന് രാവിലെ 7.30ന് കോട്ടക്കല്‍- തൃശൂര്‍ വഴി എറണാകുളത്തേക്കും നിലമ്ബൂരില്‍നിന്ന് രാവിലെ 7.45ന് പെരിന്തല്‍മണ്ണ- തൃശൂര്‍ വഴി കോട്ടയത്തേക്കും സര്‍വിസുകള്‍ തുടങ്ങിയിട്ടുണ്ട്. ഇവ യഥാക്രമം ഉച്ചക്ക് ഒരുമണിക്കും വൈകീട്ട് നാലിനും മടങ്ങും. പാലക്കാട്-കോഴിക്കോട് സര്‍വിസുകളില്‍ രണ്ടെണ്ണം വ്യാഴാഴ്ച ആരംഭിക്കും. ആരോഗ്യ പ്രവര്‍ത്തകര്‍ക്കും എസ്.എസ്.എല്‍.സി മൂല്യനിര്‍ണയ ക്യാമ്ബില്‍ പങ്കെടുക്കുന്ന അധ്യാപകര്‍ക്കും വേണ്ടിയുള്ള സര്‍വിസുകളിലും സാധാരണ യാത്രക്കാരെ കയറ്റുന്നുണ്ടെന്ന് ജില്ല ട്രാന്‍സ്പോര്‍ട്ട് ഓഫിസര്‍ അറിയിച്ചു.
രാവിലെ എട്ടിന് പാലക്കാട്ടുനിന്ന് പുറപ്പെടുന്ന ആദ്യ ബസ് 10.35ന് മലപ്പുറത്തും 12.10ന് കോഴിക്കോട്ടുമെത്തും. വൈകീട്ട് മൂന്നിനും പാലക്കാട്ടുനിന്ന് കോഴിക്കോട്ടേക്ക് വണ്ടിയുണ്ട്. ഇത് മലപ്പുറത്ത് 5.35നും കോഴിക്കോട്ട് 7.10നുമാണ് എത്തുക. കോഴിക്കോട്ടുനിന്ന് രാവിലെ എട്ടിന് പുറപ്പെടുന്ന ബസ് 9.35ന് മലപ്പുറത്തും 12.10ന് പാലക്കാട്ടുമെത്തും. വൈകീട്ട് മൂന്നിനും കോഴിക്കോട്ടുനിന്ന് പാലക്കാട്ടേക്ക് ബസുണ്ട്. 4.35ന് മലപ്പുറത്തും 7.10ന് പാലക്കാട്ടും എത്തും.
മലപ്പുറത്തുനിന്ന് രാവിലെ ഏഴിനും ഉച്ചക്കും ഒരുമണിക്കും മഞ്ചേരിയിലേക്കും വൈകീട്ട് അഞ്ചിന് കോഴിക്കോട്ടേക്കും 5.05ന് തിരൂര്‍ വഴി പൊന്നാനിയിലേക്കും 5.10ന് നിലമ്ബൂരിലേക്കും ഇതേ സമയത്തുതന്നെ പെരിന്തല്‍മണ്ണയിലേക്കും ബസ് കിട്ടും. രാവിലെ എട്ടിന് പൊന്നാനിയില്‍നിന്ന് തിരൂര്‍ (8.50)- കോട്ടക്കല്‍- മലപ്പുറം വഴി മഞ്ചേരിയിലേക്കും സര്‍വിസുണ്ട്. 10.15നാണ് ഈ ബസ് മഞ്ചേരിയിലെത്തുക. വൈകീട്ട് 4.30ന് മഞ്ചേരിയില്‍നിന്ന് പുറപ്പെടുന്നതാണ് തിരൂര്‍ വഴി പൊന്നാനിയിലേക്കുള്ള ബസ്. ഇത് 6.50ന് പൊന്നാനിയിലെത്തും.
താനൂരിലെയും വണ്ടൂരിലെയും എസ്.എസ്.എല്‍.സി മൂല്യനിര്‍ണയ ക്യാമ്ബുകളാണ് മലപ്പുറത്തുനിന്നുള്ള മറ്റു രണ്ട് സര്‍വിസുകളുടെ ലക്ഷ്യസ്ഥാനം. രാവിലെ 8.15ന് പുറപ്പെട്ട് കോട്ടക്കല്‍- തിരൂര്‍ വഴി 9.30ന് താനൂരിലും 8.15ന് യാത്ര തുടങ്ങി മഞ്ചേരി വഴി 9.30ന് വണ്ടൂരിലും ഇവ എത്തും. വൈകീട്ട് 4.30നാണ് ഇരു ബസും യഥാക്രമം താനൂരില്‍നിന്നും വണ്ടൂരില്‍നിന്നും മലപ്പുറത്തേക്ക് മടങ്ങുക.
