പാലക്കാട്: കേരളത്തില് കോവിഡ്-19 വൈറസിന്റെ പുതിയ വകഭേദമായ ഡെല്റ്റ പ്ലസ് കണ്ടെത്തിയ സാഹചര്യത്തില് പത്തനംതിട്ട, പാലക്കാട് ജില്ലകളില് ജാഗ്രത ശക്തമാക്കി ആരോഗ്യവകുപ്പ്. പത്തനംതിട്ട കടപ്രയില് ഒരാള്ക്കും പാലക്കാട് രണ്ട് പേര്ക്കുമാണ് കോവിഡ് ഡെല്റ്റ പ്ലസ് വകഭേദം റിപ്പോര്ട്ട് ചെയ്തിട്ടുള്ളത്.
50 വയസ്സില് താഴെയുള്ള രണ്ട് സ്ത്രീകളിലാണ് വൈറസ് വകഭേദം കണ്ടെത്തിയത്. പാലക്കാട് ജില്ലയിലെ പറളി,പിരായരി പഞ്ചായത്തുകളിലെ രണ്ട് സ്ത്രീകളിലാണ് ഡെല്റ്റ പ്ലസ് കണ്ടെത്തിയത്. രണ്ടിടത്തും ജാഗ്രത ശക്തമാക്കുമെന്ന് ഡി.എം.ഒ ഡോ. റീത്ത പറഞ്ഞു.ഇരുവര്ക്കും രോഗം ഭേദമായി. പറളിയില് റിപ്പോര്ട്ട് ചെയ്ത കേസില് ലക്ഷണങ്ങളുണ്ടായിരുന്നില്ല.
എന്നാല് പിരായനിയില് റിപ്പോര്ട്ട് ചെയ്ത കേസില് ലക്ഷണങ്ങളുണ്ടായിരുന്നു.
ഇവരുടെ കുടുംബാംഗങ്ങള്ക്കും കോവിഡ് ടെസ്റ്റ് നടത്തിയതാണ്. വൈറസിന് വ്യാപനം കൂടുതലായതിനാല് കരുതല് വേണം. പരിശോധനകള് കൂട്ടും. ആശങ്കപ്പെടേണ്ട സാഹചര്യം ഇപ്പോഴില്ലെന്നും ഡി.എം.ഒ ഡോ. റീത്ത അറിയിച്ചു. പത്തനംതിട്ടയില് കടപ്ര പഞ്ചായത്തിലെ 14-ാം വാര്ഡിലെ നാല് വയസുള്ള ആണ്കുട്ടിയിലാണ് ഡെല്റ്റ പ്ലസ് കണ്ടെത്തിയത്. മെയ് മാസം 24 നാണ് കുട്ടി കൊവിഡ് പോസിറ്റീവായത്. ഇപ്പോള് കുട്ടി കോവിഡ് നെഗറ്റീവാണ്. കുട്ടിയുടെ സ്രവത്തിന്റെ ജനിതക (ജീനോമിക്) പഠനത്തിലാണ് പുതിയ വേരിയന്റായ ഡെല്റ്റ പ്ലസ് കണ്ടെത്തിയത്. രോഗം പകരാതിരിക്കാനുള്ള കര്ശനമായ നിയന്ത്രണ നടപടികള് സ്വീകരിക്കാന് ജില്ലാ ഭരണകേന്ദ്രം തീരുമാനിച്ചിട്ടുണ്ട്.