ന്യൂഡല്ഹി: പന്തീരാങ്കാവ് യു.എ.പി.എ കേസില് അറസ്റ്റിലായ താഹ ഫസലിന് സുപ്രീംകോടതി ജാമ്യം നല്കി.ജസ്റ്റിസ് അജയ് രസ്തോഗി അധ്യക്ഷനായ ബെഞ്ചാണ് ജാമ്യം നല്കിയത്. സെപ്റ്റംബറില് കേസില് വാദം പൂര്ത്തിയാക്കി വിധി പറയാന് മാറ്റുകയായിരുന്നു. 2019 നവംബര് ഒന്നിനാണ് വിദ്യാര്ത്ഥികളായ താഹ ഫസിലിനെയും അലന് ഷുഹൈബിനെയും മാവോയിസ്റ്റുകളെന്ന് ആരോപിച്ച് യു.എ.പി.എ ചുമത്തി അറസ്റ്റ് ചെയ്തത്.കേസില് അലന് ഷുഹൈബിന് നേരത്തെ ഹൈക്കോടതി ജാമ്യം നല്കിയത് സുപ്രീംകോടതി ശരിവെച്ചു. അലന് ഷുഹൈബിന്റെ ജാമ്യം റദ്ദാക്കണമെന്നാവശ്യപ്പെട്ട് എന്.ഐ.എയായിരുന്നു ഹരജി നല്കിയത്. കേസില് ഇരുവര്ക്കും ജാമ്യം അനുവദിച്ചതിനെതിരെ എന്ഐഎ നല്കിയ അപ്പീലിലാണ് ഹൈക്കോടതി താഹയുടെ ജാമ്യം റദ്ദാക്കിയത്.
താഹ ഫൈസലിന്റെ കൈയില് നിന്ന് പിടിച്ചെടുത്ത ലഘുലേഖകള് യുഎപിഎ നിലനില്ക്കുന്നതിന് തെളിവാണ് എന്ന എന്ഐഎയുടെ വാദം അംഗീകരിച്ചായിരുന്നു വിധി.പ്രായം, മാനസിക നില, ചികിത്സ തുടരുന്നത്, വിദ്യാര്ത്ഥിയാണ് എന്നത് ഉള്പ്പെടെയുള്ള ഘടകങ്ങള് പരിഗണിച്ച് അലന് ഷുഹൈബിന്റെ ജാമ്യം റദ്ദാക്കേണ്ടതില്ല എന്ന് ഹൈക്കോടതി ഉത്തരവിടുകയായിരുന്നു. അലന്റെ കൈയില് നിന്ന് പിടിച്ചെടുത്ത ലഘുലേഖകള് യുഎപിഎ ചുമത്താന് പര്യാപ്തമല്ല എന്ന് ഹൈക്കോടതി നിരീക്ഷിച്ചു.മാവോയിസ്റ്റ് ബന്ധം ആരോപിക്കുന്ന ലഘുലേഖകള് കണ്ടെത്തിയതിനെ തുടര്ന്ന് 2019ലാണ് ഇരുവരെയും അറസ്റ്റ് ചെയ്തത്. മാവോയിസ്റ്റ് ബന്ധം ആരോപിച്ച് എന്.ഐ.എ തടങ്കലിലാക്കിയ രണ്ടുപേരില് ഒരാള്ക്ക് ജാമ്യം അനുവദിക്കുകയും മറ്റെയാള്ക്ക് നിഷേധിക്കുകയും ചെയ്തതിനെതിരെ സുപ്രീംകോടതി നിലപാടെടുത്തിരുന്നു. അലന് ഷുഹൈബിന് ജാമ്യം അനുവദിച്ച് താഹ ഫസലിന് ജാമ്യം നിഷേധിക്കുന്നത് ശരിയല്ലെന്നായിരുന്നു കോടതി നിരീക്ഷണം.