“വിജയത്തിൻറെ വാതിൽ, വാളിൻറെ തണലിൽ” : ജിഹാദിനെ പ്രകീർത്തിക്കുന്ന സിറിയൻ മത പുരോഹിതൻറെ ഗ്രന്ഥ തർജ്ജമ കേരളത്തിൽ ഐഎസ് ആശയ പ്രചാരണത്തിന് ഉപയോഗിക്കുന്നു; സർക്കാരിനോട് ഗ്രന്ഥം നിരോധിക്കണമെന്നാവശ്യപ്പെട്ട് ഡിജിപി.

തീവ്രവാദ സ്വഭാവമുള്ളതും രാജ്യവിരുദ്ധ ഉള്ളടക്കമുള്ളതും മതങ്ങൾ തമ്മിൽ സ്പർധയുണ്ടാക്കുന്നതും യുവാക്കളെ തീവ്രവാദ ഗ്രൂപ്പുകളിൽ ചേരുന്നതിനു പ്രേരിപ്പിക്കുന്നതുമായ ഉള്ളടക്കമാണ് പുസ്തകത്തിലെന്നാണ് പൊലീസിന്റെ കണ്ടെത്തൽ. ഇക്കാരണത്താൽ സമൂഹ മാധ്യമങ്ങളിലടക്കം പുസ്തകത്തെ നിരോധിക്കണമെന്ന് ആവശ്യപ്പെട്ട് ജൂലൈ 21ന് ഡിജിപി ആഭ്യന്തര വകുപ്പിനു കത്തു നൽകിയിരുന്നു. പിന്നാലെയാണ് കമ്മിറ്റി രൂപീകരിച്ചത്. ഇംഗിഷ് പരിഭാഷ ഇന്റർനെറ്റിലുണ്ടെങ്കിലും മലയാളം വിവർത്തനമാണ് യുവാക്കൾക്കിടയിൽ ഏറെ പ്രചരിച്ചതെന്നും അന്വേഷണ ഏജൻസികൾ കണ്ടെത്തിയിരുന്നു.

പതിനഞ്ചാം നൂറ്റാണ്ടില്‍ ജീവിച്ച സിറിയന്‍ പണ്ഡിതന്‍ അഹ്‌മദ് ഇബ്രാഹിം മുഹമ്മദ് ദിമശ്ഖിയുടെ, മശാരിഉല്‍ അശ്‌വാഖ് ഇലാ മസ്വാരിഇല്‍ ഉശ്ശാഖ് വ മുസീറുല്‍ ഗറാം ഇലാ ദാറിസ്സലാം എന്ന ഗ്രന്ഥവും മലയാള തർജ്ജമയും ആണ് നിരോധിക്കണമെന്ന് ആവശ്യപ്പെട്ടിരിക്കുന്നത്. ദേശവിരുദ്ധവും തീവ്ര മതമൗലികവാദവും അടങ്ങുന്ന ഉള്ളടക്കങ്ങള്‍ പുസ്തകത്തിലുണ്ട് എന്നാണ് ശിപാര്‍ശയില്‍ പറയുന്നത്. ഐഎസിന്റെ ആശയപ്രചാരണത്തിന് ഈ പുസ്തകം ഉപയോഗിക്കുന്നതായും സര്‍ക്കാര്‍ കരുതുന്നു.

ജിഹാദിന്റെ ശ്രേഷ്ഠതകള്‍ പ്രതിപാദിക്കുന്ന ഗ്രന്ഥമാണിത്. രക്തസാക്ഷിത്വം, ജിഹാദിന്റെ ചരിത്രം, ധൈര്യം തുടങ്ങി 17 അധ്യായങ്ങളാണ് പുസ്തകത്തിലുള്ളത്. പുസ്തകം ബര്‍മിങ്ഹാമിലെ മക്തബ ബുക്ക് സെല്ലേഴ്‌സ് ആന്‍ഡ് പബ്ലിഷേഴ്‌സ് ഇംഗ്ലീഷിലേക്ക് വിവര്‍ത്തനം ചെയ്തിട്ടുണ്ട്. പുസ്തകം ഇന്റര്‍നെറ്റില്‍ സൗജന്യമായി ലഭ്യവുമാണ്. ഇമാം ഇബ്‌നുന്നുഹാസ് എന്ന പേരിലാണ് ഗ്രന്ഥ കര്‍ത്താവ് പ്രസിദ്ധനായത്. ദമസ്‌കസിലാണ് ജനനം. പിന്നീട് ഈജിപ്തിലേക്ക് കുടിയേറി. ബൈസന്റൈന്‍ സേനയുമായുള്ള യുദ്ധത്തില്‍ 1411ല്‍ അന്തരിച്ചു.