കൊച്ചി: ലൂസി കളപ്പുര കോണ്‍വെന്‍റില്‍നിന്നു മാറിത്താമസിച്ചാല്‍ പോലീസ് സംരക്ഷണം നല്‍കാമെന്നു ഹൈക്കോടതി. മഠത്തില്‍ ഭീഷണിയുണ്ടെന്നും സംരക്ഷണം വേണമെന്നും ആവശ്യപ്പെട്ട് മുന്‍ എഫ്സിസി അംഗം ലൂസി സമര്‍പ്പിച്ച ഹര്‍ജിയിലാണ് ജസ്റ്റീസ് രാജാവിജയരാഘവന്‍റെ ഉത്തരവ്.
ലൂസി മഠത്തില്‍ നിന്നു മാറണോ എന്നതു സംബസിച്ച കേസ് മുന്‍സിഫ് കോടതി‌യുടെ പരിഗണനയിലുള്ളതിനാല്‍ ഇറങ്ങാന്‍ കോ‌ടതിക്ക് നിര്‍ദ്ദേശിക്കാനാകില്ല. ലൂസി കോണ്‍വെന്‍റില്‍ നിന്ന് മാറണോ എന്ന് തീരുമാനിക്കേണ്ടത് മുന്‍സിഫ് കോടതിയാണ്.
അതേസമയം, ഇതു സംബന്ധിച്ച കേസ് വേഗത്തില്‍ തീര്‍പ്പാക്കണമെന്നും ഹൈക്കോടതി നിര്‍ദ്ദേശിച്ചിട്ടുണ്ട്.
കാരക്കമാല കോണ്‍വെന്‍റിലെ താമസത്തിന് പോലീസ് സംരക്ഷണം നല്‍കാനാവില്ല. മറ്റ് എവിടെയെങ്കിലും താമസിക്കുകയാണെങ്കില്‍ പോലീസ് സംരക്ഷണം നല്‍കാമെന്നാണ് ഹൈക്കോടതി നിര്‍ദ്ദേശം.
കോണ്‍വെന്‍റിലെ സിസിടിവി ദൃശ്യങ്ങള്‍ സംരക്ഷിക്കപ്പെടണം എന്ന ലൂസിയുടെ ആവശ്യത്തില്‍ മജിസ്ട്രേറ്റ് കോടതിയെ സമീപിക്കാനും കോടതി നിര്‍ദ്ദേശിച്ചു. കോണ്‍വെന്‍റിലെ താമസവുമായി ബന്ധപ്പെട്ട് ഒരാഴ്ചക്കുള്ളില്‍ ഏതെങ്കിലും ഒരു കക്ഷി മുന്‍സിഫ് കോടതിയെ സമീപിച്ചാല്‍, അതില്‍ മൂന്ന് ആഴ്ചക്കുള്ളില്‍ തീരുമാനം എടുക്കാനും ഹൈക്കോടതി നിര്‍ദ്ദേശിച്ചു.
ലൂസിക്ക് എന്തെങ്കിലും പരാതിയുണ്ടെങ്കില്‍ നടപടി എടുക്കാനും പോലീസിനോട് നിര്‍ദേശിച്ച കോടതി സംരക്ഷണം ആവശ്യപ്പെട്ടുള്ള ഹര്‍ജി തീര്‍പ്പാക്കി. നേരത്തെ കേസ് പരിഗണിച്ചപ്പോള്‍ ലൂസി മഠത്തില്‍നിന്നു മാറി താമസിക്കുന്നതല്ലേ ഉചിതമെന്നു കോടതി വാക്കാല്‍ പരാമര്‍ശിച്ചിരുന്നു.
