തിരുവനന്തപുരം: വിമാനത്തിനുള്ളില്‍ വച്ച്‌ മുഖ്യമന്ത്രി പിണറായി വിജയനെതിരെ നടന്ന യൂത്ത് കോണ്‍ഗ്രസിന്‍റെ പ്രതിഷേധവുമായി ബന്ധപ്പെട്ട് മുന്‍ എംഎല്‍എ കെ.എസ്. ശബരീനാഥന് പോലീസ് നോട്ടീസ്. ചോദ്യം ചെയ്യലിനായി ചൊവ്വാഴ്ച രാവിലെ 11ന് ഹാജരാകാന്‍ നിര്‍ദേശിച്ച്‌ ശബരിനാഥന് ശംഖുമുഖം അസിസ്റ്റന്‍റ് കമ്മീഷണര്‍ നോട്ടീസ് നല്‍കി.
പ്രതിഷേധത്തിന് നിര്‍ദേശം നല്‍കിയത് ശബരീനാഥനാണെന്ന് വിവരം ലഭിച്ചതിന്‍റെ അടിസ്ഥാനത്തിലാണ് നടപടി. സംഭവവുമായി ബന്ധപ്പെട്ട് വധശ്രമത്തിനാണ് പോലീസ് കേസ് രജിസ്റ്റര്‍ ചെയ്തത്.വിമാനത്തിനുള്ളില്‍ മുഖ്യമന്ത്രിക്കെതിരെ പ്രതിഷേധിക്കാനുള്ള സാധ്യതയെക്കുറിച്ച്‌ ശബരീനാഥന് യൂത്ത്കോണ്‍ഗ്രസിന്‍റെ ഒരു വാട്സാപ്പ് ഗ്രൂപ്പില്‍ നിര്‍ദേശിക്കുന്നതിന്‍റെ സ്ക്രീന്‍ഷോട്ട് കഴിഞ്ഞ ദിവസം പ്രചരിച്ചിരുന്നു. ഇതിന് പിന്നാലെയാണ് പോലീസ് ചോദ്യം ചെയ്യാന്‍ വിളിപ്പിച്ചത്.
