സ്വർണക്കടത്ത് കേസിലെ ഗൂഢാലോചന: സരിതയുടെ രഹസ്യ മൊഴി രേഖപ്പെടുത്തും; സിപിഎമ്മിനെയും മുഖ്യമന്ത്രിയേയും രക്ഷിക്കാൻ സരിത വീണ്ടും വരുന്നു.

നേരത്തെ പിസി ജോർജും സരിതയും തമ്മിൽ സംസാരിക്കുന്ന ഫോൺ സംഭാഷണം നേരത്തെ പുറത്ത് വന്നിരുന്നു. ഇതിന് പിന്നാലെയാണ് സരിതയെ കേസിൽ സാക്ഷിയാക്കിയത്. സരിതയുടെ മൊഴി നിർണായകമാണെന്നാണ് അന്വേഷണ സംഘത്തിന്റെ വിലയിരുത്തൽ. കേസിൽ ആദ്യമായാണ് ഒരാളുടെ മൊഴി രേഖപ്പെടുത്തുന്നത്.

അതിനിടെ, മുഖ്യമന്ത്രിക്കെതിരെയും സർക്കാരിനെതിരെയും സ്വപ്ന സുരേഷ് ഉയർത്തുന്ന ആരോപണം തന്നെക്കൊണ്ട് പറയിപ്പിക്കാനായിരുന്നു നീക്കമെന്ന് സരിത പറഞ്ഞു. പിസി ജോർജ് വഴിയാണ് നീക്കം നടന്നത്. എന്നാൽ, തെളിവില്ലെന്ന് മനസിലാക്കിയതോടെ താൻ പിന്മാറി. പിസി ജോർജും സ്വപ്ന സുരേഷും തമ്മിൽ കൂടിക്കാഴ്ച നടത്തിയിട്ടുണ്ടെന്നും സരിത കൂട്ടിച്ചേർത്തു.

‘ഇന്നലെ മൊഴിയെടുത്തു, പ്രത്യേക അന്വേഷണ സംഘമായിരുന്നു. പിസി ജോർജിന്റെ ഫോൺ സംഭാഷണം ചോർന്ന് പുറത്തുവന്നല്ലോ. അതേപ്പറ്റിയുള്ള ചോദ്യങ്ങളാണ് ചോദിച്ചത്. പിസി ജോർജ് സംസാരിച്ച കാര്യങ്ങൾ ഒന്നുകൂടി വ്യക്തമാക്കാമോ എന്ന് ചോദിച്ചു. അത് വിവരിച്ചു. ഗൂഢാലോചന എന്നുപറയാൻ കാരണം, അവരുടെ കയ്യിൽ തെളിവില്ലെന്ന് എനിക്കറിയാമായിരുന്നു. കാരണം ജയിലിൽ വച്ച് ഇവര് ഒളിച്ചുസംസാരിക്കുന്നുണ്ടായിരുന്നു. തെളിവില്ലാത്തതുകൊണ്ട് ഒന്നും ചെയ്യാൻ പറ്റില്ലെന്ന് ഇവർ പറഞ്ഞിരുന്നു. രണ്ടാമത്, മുഖ്യമന്ത്രിക്ക് പങ്കില്ല, ശിവശങ്കറിനാണ് പങ്കെന്നും പറഞ്ഞിരുന്നു. എന്നാൽ, ശിവശങ്കറിനെതിരെ പോലും ഒന്നും സംസാരിക്കാൻ തന്റെ കയ്യിലില്ല എന്നും പറഞ്ഞു.’ സരിത എസ് നായർ പ്രതികരിച്ചു.

സ്വപ്നയെയും പി സി ജോർജിനെയും ബന്ധപ്പെടുത്തി ഗൂഢാലോചന സിദ്ധാന്തം മെനയാൻ ആണ് പോലീസ് ശ്രമിക്കുന്നത് എന്ന ആക്ഷേപവും ഉയർന്നുവന്നു കഴിഞ്ഞു. പതിവുപോലെ സിപിഎം രക്ഷയ്ക്ക് സരിത നായരെ കളത്തിലിറക്കി എന്നും പരിഹാസമുണ്ട്. സ്വപ്നമായി ബന്ധപ്പെട്ട ആരോപണം ഉയരുമ്പോൾ സരിതയെ മുൻനിർത്തി പ്രതിരോധിക്കാനുള്ള സിപിഎം നീക്കം പാർട്ടി അണികൾക്കിടയിൽ തന്നെ അഭിപ്രായവ്യത്യാസം ഉണ്ടാക്കുന്നു എന്ന് റിപ്പോർട്ടുകൾ ഉണ്ട്. എന്തായാലും ഇത്തരമൊരു നീക്കം ഫലപ്രാപ്തിയിൽ എത്തുമോ എന്ന് കാത്തിരുന്നു കാണണം.