തിരുവനന്തപുരം: ബൈക്കില് അഭ്യാസ പ്രകടനവും ലഹരി ഉപയോഗവും ചൂണ്ടിക്കാണിച്ച് സ്കൂള് വിദ്യാര്ത്ഥികള്ക്കെതിരെ പരാതി നല്കിയ യുവാവിന് ക്രൂര മര്ദനം. വര്ക്കല ചാവടിമുക്ക് സ്വദേശി അനു(32)വിനെയാണ് വിദ്യാര്ത്ഥികള് മര്ദിച്ചത്. മാര്ച്ച് 31നാണ് സംഭവം.
വീടിനു സമീപമുള്ള സ്കൂളിലെ വിദ്യാര്ത്ഥികള് കഞ്ചാവ് ഉപയോഗിക്കുന്നതും ബൈക്കില് അഭ്യാസപ്രകടനങ്ങള് നടത്തുന്നതും ചൂണ്ടിക്കാണിച്ച് അനു അടക്കമുള്ള നാട്ടുകാര് പോലീസില് പരാതി നല്കിയിരുന്നു. ആദ്യം സ്കൂളില് പരാതിപ്പെട്ടെങ്കിലും വിദ്യാര്ഥികളുടെ ശല്യം രൂക്ഷമായതോടെ അയിരൂര് പോലീസിനെ സമീപിക്കുകയായിരുന്നു. ഇതിന്റെ വൈരാഗ്യത്തിലാണ് അനുവിനെ മര്ദിച്ചതെന്നാണ് കുടുംബത്തിന്റെ പരാതി.
മാര്ച്ച് 31-ന് രാത്രി സമീപത്തെ ക്ഷേത്രത്തിലെ ഉത്സവത്തില് പങ്കെടുത്ത് മടങ്ങുന്നതിനിടെയാണ് വിദ്യാര്ത്ഥികള് അനുവിനെ ആക്രമിച്ചത്. മുഖത്ത് കല്ലെറിഞ്ഞ് വീഴ്ത്തിയ ശേഷമായിരുന്നു മര്ദനം. ഗുരുതരമായി പരിക്കേറ്റ യുവാവിനെ ആദ്യം വര്ക്കല താലൂക്ക് ആശുപത്രിയിലും പിന്നീട് ഫോര്ട്ട് ആശുപത്രിയിലും പ്രവേശിപ്പിച്ചു. മര്ദനത്തില് യുവാവിന്റെ മുഖത്തെ എല്ലുകള് പൊട്ടിയിട്ടുണ്ട്.
വിദ്യാര്ത്ഥികള്ക്കെതിരെ സിസിടിവി ദൃശ്യങ്ങള് സഹിതം അനുവിന്റെ കുടുംബം അയിരൂര് പോലീസിനും വര്ക്കല ഡിവൈ.എസ്.പിക്കും പരാതി നല്കി. സംഭവത്തില് അയിരൂര് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.