തിരുവനന്തപുരം: മീഡിയവണ് ചാനലിന്റെ സംപ്രേഷണം തടഞ്ഞ കേന്ദ്ര സര്ക്കാര് നടപടിക്കെതിരെ തലസ്ഥാനത്ത് മാധ്യമപ്രവര്ത്തകരുടെ പ്രതിഷേധം. കേരള പത്രപ്രവര്ത്തക യൂനിയന്റെ നേതൃത്വത്തില് പാളയം രക്തസാക്ഷി മണ്ഡപത്തില് മെഴുകുതിരി തെളിച്ച് പ്രതിഷേധ ജ്വാല സംഗമം സംഘടിപ്പിച്ചു. സി.ഐ.ടി.യു സംസ്ഥാന പ്രസിഡന്റ് ആനത്തലവട്ടം ആനന്ദന് ഉദ്ഘാടനം ചെയ്തു.
കേന്ദ്രസര്ക്കാര് ജനാധിപത്യ അവകാശങ്ങളും ഭരണഘടന മൂല്യങ്ങളും ചവിട്ടിമെതിക്കുകയാണെന്നും മീഡിയവണ് ചാനലിന്റെ വിലക്കില് അതാണ് പ്രകടമായതെന്നും അദ്ദേഹം പറഞ്ഞു. കേന്ദ്ര സര്ക്കാര് പ്രയോഗിച്ച കിരാതനടപടി അടിയന്തരമായി പിന്വലിക്കണം. രാഷ്ട്രപിതാവ് കൊല ചെയ്യപ്പെട്ടതിന്റെ വാര്ഷിക ദിനത്തിന് തൊട്ടടുത്ത ദിവസമാണ് മാധ്യമ സ്വാതന്ത്ര്യം നിഷേധിച്ച് കേന്ദ്രം ഉത്തരവിറക്കിയത്. ജനാധിപത്യ, പൗരാവകാശങ്ങള് നിഷേധിക്കുന്നതിന്റെ ഭാഗമാണ് മാധ്യമങ്ങള്ക്ക് നേരെ വരുന്ന ആക്രമണങ്ങള്.
ജനങ്ങളുടെ വിചാര, വികാരങ്ങളാണ് മാധ്യമങ്ങള് പ്രകടിപ്പിക്കുന്നത്. അവയുടെ വായ മൂടിക്കെട്ടാനും തങ്ങള് ചെയ്യുന്ന തോന്ന്യാസങ്ങള് മാത്രമേ പ്രസിദ്ധീകരിക്കാവൂ എന്ന് പറയുന്നതും ഏകാധിപത്യ വാഴ്ചക്ക് ഹാലേലുയ്യ പാടലാണ്. സ്വതന്ത്രവും നീതിപൂര്വകവുമായ മാധ്യമമേഖലയാണ് വേണ്ടത്. അതിന് മൂക്കുകയറിട്ട് സ്തുതിഗീതം പാടുന്നവരാക്കണമെന്നാണ് ആഗ്രഹമെങ്കില് എല്ലാ മാധ്യമങ്ങളും അതിന് കൂട്ടുനിന്നെന്ന് വരില്ല.-ആനത്തലവട്ടം പറഞ്ഞു. പത്രപ്രവര്ത്തക യൂനിയന് സംസ്ഥാന പ്രസിഡന്റ് കെ.പി. റെജി അധ്യക്ഷത വഹിച്ചു.