തൃശൂര്‍: വിമാനയാത്രയ്ക്കിടെ സഹയാത്രികന്‍ അപമര്യാദയായി പെരുമാറിയ സംഭവത്തിൽ പരാതി നൽകിയ നടി ദിവ്യപ്രഭയുടെ മൊഴി പൊലീസ് രേഖപ്പെടുത്തി. തൃശൂര്‍ സ്വദേശിയായ ആന്റോയാണ് പ്രതിയെന്ന് തിരിച്ചറിഞ്ഞതായും അറസ്റ്റ് ഉടന്‍ ഉണ്ടാകുമെന്നും പൊലീസ് അറിയിച്ചു. മുംബൈ-കൊച്ചി എയര്‍ ഇന്ത്യാ വിമാനത്തില്‍ ചൊവ്വാഴ്ച വൈകിട്ടാണ് സംഭവം. മദ്യലഹരിയില്‍ ആയിരുന്ന സഹയാത്രികന്‍ അടുത്ത് വന്നിരുന്ന് അപമര്യാദയായി പെരുമാറുകയായിരുന്നു എന്ന് നടിയുടെ പരാതിയില്‍ പറയുന്നു.
വിമാനയാത്രയ്ക്കിടെ തൊട്ടടുത്ത സീറ്റിലിരുന്ന സഹയാത്രികന്‍ അനാവശ്യമായി വാക്കുതര്‍ക്കം നടത്തിയെന്നും ശരീരത്തില്‍ സ്പര്‍ശിച്ചുവെന്നുമാണ് ദിവ്യപ്രഭയുടെ പരാതി. വിമാനത്തില്‍ വച്ച് തന്നെ വിഷയം എയര്‍ ഹോസ്റ്റസിന്റെ ശ്രദ്ധയില്‍പ്പെടുത്തിയിരുന്നു എന്നും എന്നാല്‍, സഹയാത്രികനെതിരെ നടപടിയെടുക്കാതെ തന്നെ സീറ്റ് മാറ്റി ഇരുത്തുക മാത്രമാണ് ഉണ്ടായതെന്നും നടി വ്യക്തമാക്കി. പൊലീസിന് പരാതി നല്‍കാനായിരുന്നു എയര്‍ ഇന്ത്യ അധികൃതരുടെ നിര്‍ദ്ദേശം എന്നും നടി കൂട്ടിച്ചേർത്തു.
തുടർന്ന്, കൊച്ചിയിലെത്തിയ ശേഷം ദിവ്യപ്രഭ നെടുമ്പാശേരി പൊലീസില്‍ പരാതി നല്‍കി. സോഷ്യൽ മീഡിയയിലൂടെയാണ് താരം തന്റെ ദുരനുഭവം വെളിപ്പെടുത്തിയത്. സംഭവത്തില്‍ ഉചിതമായ നടപടി വേണമെന്നും, ഇനിയും ഇത്തരം കാര്യങ്ങള്‍ ആവര്‍ത്തിക്കാന്‍ പാടില്ലെന്നും വിമാനയാത്രക്കാരുടെ സുരക്ഷ ഉറപ്പാക്കണമെന്നും നടി ആവശ്യപ്പെട്ടു.
