കോഴിക്കോട്: കൊടകര കുഴല്‍പ്പണ കേസില്‍ അന്വേഷണ സംഘത്തിന് മുന്നില്‍ ചൊവ്വാഴ്ച ഹാജരാകില്ലെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. മാധ്യമപ്രവര്‍ത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. മുന്‍കൂട്ടി നിശ്ചയിച്ച പാര്‍ട്ടി സംസ്ഥാന ഭാരവാഹി യോഗമുള്ളതിനാലാണ് ചൊവ്വാഴ്ച ഹാജരാകാന്‍ കഴിയാത്തത്. ഇക്കാര്യം താന്‍ അന്വേഷണ സംഘത്തെ അറിയിച്ചിട്ടുണ്ട്. പിന്നീട് എപ്പോള്‍ ഹാജരാകാന്‍ കഴിയുമെന്ന കാര്യം പരിശോധിച്ച്‌ തീരുമാനിക്കും.
സ്വര്‍ണക്കടത്ത് കേസുകളും മുട്ടില്‍ മരംമുറി കേസിലും പ്രതിരോധത്തിലായ സര്‍ക്കാര്‍ മുഖം രക്ഷിക്കാനാണ് ഹാജരാകാന്‍ തനിക്ക് നോട്ടീസ് നല്‍കിയത്.പൊലീസിന്റെ തീരുമാനമല്ല രാഷ്ട്രീയ തീരുമാനമാണ് ഇക്കാര്യത്തിലുണ്ടായിരിക്കുന്നതെന്നും സുരേന്ദ്രന്‍ കുറ്റപ്പെടുത്തി. ഏപ്രില്‍ മൂന്നിന് പുലര്‍ച്ചെ ദേശീയപാതയില്‍ വാഹനാപകടമുണ്ടാക്കി മൂന്നരക്കോടി രൂപ കൊള്ളയടിച്ച കേസിലാണ് പൊലീസ് അന്വേഷണം നടത്തുന്നത്. കേസില്‍ 22 പേരെ ഇതുവരെ അറസ്റ്റ് ചെയ്തിട്ടുണ്ട്.
