തിരുവനന്തപുരം: സംസ്ഥാനത്തെ സാധാരണക്കാരായ കലാകാരന്മാര്‍ ഒരുക്കുന്ന കലാമൂല്യമുള്ള സിനിമകള്‍ പ്രദര്‍ശിപ്പിക്കാന്‍ സര്‍ക്കാര്‍ നിയന്ത്രണത്തില്‍ ഒ.ടി.ടി പ്ലാറ്റ്ഫോം ഒരുക്കുമെന്ന് മന്ത്രി സജി ചെറിയാന്‍. റേറ്റിങ് കുറഞ്ഞ താരങ്ങളുടെ സിനിമകള്‍ക്ക് പ്രദര്‍ശനത്തിലുള്ള അവസരം കുറവാണ്. തിയറ്ററുകളില്‍ പ്രദര്‍ശിപ്പിച്ച മെഗാസ്റ്റാര്‍ സിനിമകള്‍ ഉള്‍പ്പെടെ സര്‍ക്കാര്‍ നിയന്ത്രിത ഒ.ടി.ടി പ്ലാറ്റ്ഫോമില്‍ ലഭ്യമാക്കാനാണ് ആലോചിക്കുന്നത്. സ്വന്തമായി ഒ.ടി.ടി പ്ലാറ്റ്ഫോം തുടങ്ങുന്നതിെന്‍റയും നിലവിലുള്ള ഒ.ടി.ടി പ്ലാറ്റ്ഫോം വാടകക്കെടുന്നതിെന്‍റയും സാധ്യതകള്‍ പരിശോധിക്കുന്നുണ്ട്.
നാടകം ഉള്‍പ്പെടെ സ്റ്റേജ് ഷോകള്‍ അവതരിപ്പിച്ച്‌ ജനങ്ങളിലെത്തിക്കാനുള്ള പ്ലാറ്റ്ഫോമിനെക്കുറിച്ചും സര്‍ക്കാര്‍ ആലോചിക്കുന്നുണ്ട്. സംസ്ഥാനത്തെ സിനിമ മേഖലയെ വ്യവസായമാക്കി മാറ്റുകയാണ് സര്‍ക്കാര്‍ ലക്ഷ്യമിടുന്നത്.
എല്ലാ സിനിമകളും ഷൂട്ട് ചെയ്യാന്‍ കഴിയുന്ന രീതിയില്‍ ചിത്രാഞ്ജലി സ്റ്റുഡിയോ വികസിപ്പിക്കാന്‍ 150 കോടി രൂപയുടെ പദ്ധതി നടപ്പാക്കും. 65 കോടിയുടെ നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കും. സീരിയലുകളുമായി ബന്ധപ്പെട്ട് കുടുംബങ്ങളിലെ മാനസിക സംഘര്‍ഷങ്ങള്‍ വര്‍ധിക്കുന്നതായി ആക്ഷേപമുണ്ട്. സീരിയലുകള്‍ കലാമൂല്യമുള്ളതാക്കാന്‍ ഇടപെടല്‍ ആവശ്യമാണ്. സ്ത്രീധനത്തിനെതിരെ സാംസ്കാരിക വകുപ്പ് ബോധവത്കരണ പരിപാടി നടപ്പാക്കും.
എന്‍.സി.സി, എന്‍.എസ്.എസ്, നെഹ്റു യുവകേന്ദ്ര, യുവജന കമീഷന്‍ തുടങ്ങി എട്ട് സര്‍ക്കാര്‍ അംഗീകൃത സംവിധാനങ്ങളുടെ പ്രവര്‍ത്തനം ഏകോപിപ്പിക്കും. ബാലഭവനുകളുടെ പ്രവര്‍ത്തനം ആദ്യം 14 ജില്ലകളിലേക്കും രണ്ടാംഘട്ടത്തില്‍ 140 നിയമസഭ മണ്ഡലങ്ങളിലേക്കും വ്യാപിപ്പിക്കുമെന്നും മന്ത്രി പറഞ്ഞു.
