കൊല്ലം: പീഡന പരാതിയില് ഒത്തുതീര്പ്പിന് വേണ്ടി മന്ത്രി എ.കെ ശശീന്ദ്രന് ഇടപെട്ട സംഭവത്തില് മന്ത്രിക്കെതിരെ ഗവര്ണര്ക്ക് പരാതി നല്കുമെന്ന് യുവതി. സ്വമേധയാ ആണ് ഗവര്ണര്ക്ക് പരാതി നല്കുന്നതെന്ന് വ്യക്തമാക്കിയ അവര് നിയമോപദേശം ലഭിച്ചിട്ടുണ്ടെന്നും ബിജെപിയുടെ പിന്തുണ തനിക്കുണ്ടെന്നും കൂട്ടിച്ചേര്ത്തു.
മന്ത്രിക്കെതിരായ പരാതിയില് നിന്നും പിന്മാറില്ല. പ്രതിക്കൊപ്പം നിന്ന് പൊലീസ് അധിക്ഷേപിക്കുകയാണെന്നും ആരോപിച്ചു. ഇന്നലെ മൊഴി രേഖപ്പെടുത്താന് പൊലീസ് സംഘം വീട്ടില് എത്തിയിരുന്നെങ്കിലും വീട്ടില് ഇല്ലെന്ന കാരണം പറഞ്ഞ് മടങ്ങി പോവുകയായിരുന്നു. എന്നാല് മൊഴിയെടുപ്പിനെ കുറിച്ച് പൊലീസ് ഇതുവരെയും അറിയിപ്പൊന്നും നല്കിയിട്ടില്ലെന്നും യുവതി വ്യക്തമാക്കി.ശശീന്ദ്രന് ചെയ്തത് പാര്ട്ടിക്കാര് തമ്മിലുള്ള പ്രശ്നത്തില് ഇടപെടുക മാത്രമാണെന്നും പൊലീസ് കേസെടുക്കാന് വൈകിയോ എന്ന കാര്യം അന്വേഷിച്ച് വരികയാണെന്നുമാണ് നിയമസഭയെ മുഖ്യമന്ത്രി അറിയിച്ചത്.എന്സിപി കൊല്ലം ഗ്രൂപ്പില് തനിക്കെതിരായി നടന്ന വാട്സാപ്പ് പ്രചാരണത്തില് യുവതി പരാതി നല്കിയിരുന്നു. എന്സിപി സംസ്ഥാന ഭാരവാഹി പത്മാകരന് തന്റെ കയ്യില് കയറി പിടിച്ചെന്ന പരാതിയില് രണ്ട് പേരെയും പൊലീസ് സ്റ്റേഷനിലേക്ക് വിളിപ്പിച്ചിട്ടുള്ളതാണ്. ആദ്യം യുവതി സ്റ്റേഷനില് ഹാജരായില്ല. പിന്നീട് കേസ് റജിസ്റ്റര് ചെയ്യുന്നതില് കാലതാമസമുണ്ടായോ എന്ന കാര്യം പൊലീസ് മേധാവി നേരിട്ട് അന്വേഷിക്കുന്നുണ്ടെന്നും മുഖ്യമന്ത്രി പറഞ്ഞു. മന്ത്രിയെ ന്യായീകരിച്ച് പൂര്ണ പിന്തുണ നല്കുന്ന നിലപാടാണ് സര്ക്കാര് സ്വീകരിക്കുന്നത്.