ബംഗളൂരു: ചിക്കന്‍ ഫ്രൈക്ക് രുചി പോരെന്ന് ആരോപിച്ചുള്ള തര്‍ക്കത്തിനൊടുവില്‍ പ്രകോപിതനായ ഭര്‍ത്താവ് ഭാര്യയെ മരത്തടി കൊണ്ട് അടിച്ചുകൊലപ്പെടുത്തി. സംഭവത്തില്‍ ബംഗളൂരു ചിക്കബാനവാരയിലെ താരബനഹള്ളിയില്‍ താമസിക്കുന്ന കച്ചവടക്കാരനായ മുബാറാക്ക് പാഷയെ (30) പൊലീസ് അറസ്റ്റ് ചെയ്തു.
മുബാറക്ക് പാഷയുടെ അടിയേറ്റ് ഭാര്യ ഷിരിന്‍ ബാനു (28) ആണ് കൊല്ലപ്പെട്ടത്. മകളെ കാണാനില്ലെന്ന മാതാപിതാക്കള്‍ നല്‍കിയ പരാതിയില്‍ പൊലീസ് അന്വേഷണം നടക്കുന്നതിനിടെ മുബാറക്ക് പാഷ കീഴടങ്ങുകയായിരുന്നു. കൊലപ്പെടുത്തി‍യശേഷം മൃതദേഹം ചിക്കബാനവാര തടാകത്തില്‍ തള്ളിയെന്നും ഇയാള്‍ മൊഴി നല്‍കി. പ്രായപൂര്‍ത്തിയാകാത്ത മൂന്നു മക്കളും ഇവര്‍ക്കുണ്ട്.
ദാവന്‍ഗരെ സ്വദേശികളായ മുബാറക്കും ഷിരന്‍ ബാനുവും അഞ്ചുവര്‍ഷം മുമ്പാണ് വിവാഹിതരായത്. ആഴ്ചകള്‍ക്ക് മുമ്പ് ഷിരന്‍ ബാനുവിന്റെ സഹോദരി വീട്ടിലെത്തിയപ്പോള്‍ ചിക്കന്‍ ഫ്രൈ ഉണ്ടാക്കിയിരുന്നു. എന്നാല്‍, സഹോദരിയുടെ മുന്നില്‍ വെച്ച്‌ ചിക്കന്‍ ഫ്രൈ മോശമാണെന്നും ഉണ്ടാക്കാന്‍ അറിയില്ലെന്നും ഷിരിനെ മുബാറക്ക് കളിയാക്കി.
സഹോദരി പോയശേഷം ഇതേച്ചൊല്ലി ഇരുവരും വഴക്കിട്ടു. ഇതിനിടയില്‍ നിയന്ത്രണംവിട്ട മുബാറക്ക് മരത്തടി എടുത്ത് ഷിരിനെ അടിച്ചു. തലക്കടിയേറ്റ ഷിരിന്‍ മരിച്ചു എന്നറിഞ്ഞതോടെയാണ് തെളിവ് നശിപ്പിക്കാന്‍ മൃതദേഹം മുബാറക്ക് തടാകത്തില്‍ തള്ളിയതെന്ന് പൊലീസ് പറഞ്ഞു.
