ആര് ഞാനോ? എപ്പോൾ? 2000 രൂപ നോട്ടിൽ ചിപ്പ് ഉണ്ടെന്നുള്ള സ്വന്തം വീഡിയോ എഡിറ്റ് ചെയ്തതെന്ന അവകാശവാദവുമായി ആജ് തക് അവതാരക; ശ്വേതാ സിങ്ങിന്റെ 2018ലെ വീഡിയോയും, എല്ലാം നിഷേധിക്കുന്ന ഇന്നത്തെ വീഡിയോയും കാണാം.

‘2,000 രൂപാ നോട്ടില്‍ നാനോ ചിപ്പുണ്ടെന്ന് ഞാൻ പറഞ്ഞിട്ടില്ല. 45 മിനിറ്റ് വിഡിയോയുടെ 45 സെക്കൻഡ് മാത്രം കണ്ടാണ് നിങ്ങളിത് പറയുന്നത്. 45 മിനിറ്റ് വിഡിയോ പൂര്‍ണമായും കണ്ടാല്‍ നിങ്ങളിത് പറയില്ല. വാട്‌സ്‌ആപ്പില്‍ ഫോര്‍വാഡ് ചെയ്ത് കിട്ടിയ വിവരമാണിതെന്ന് അതില്‍ ഞാൻ പറയുന്നുണ്ട്. അത് കട്ട് ചെയ്താണ് നിങ്ങള്‍ പ്രചരിപ്പിക്കുന്നത്. നിങ്ങള്‍ കള്ളം പ്രചരിപ്പിക്കുകയാണ് ചെയ്യുന്നത്. അത് എഡിറ്റ് ചെയ്ത വിഡിയോ ആണ്.’-ശ്വേത വിശദീകരിച്ചു.നോട്ടുനിരോധനത്തിനു പിന്നാലെ ആജ് തക് പ്രക്ഷേപണം ചെയ്ത തത്സമയ പരിപാടിയിലായിരുന്നു ശ്വേത അടക്കമുള്ള മാധ്യമപ്രവര്‍ത്തകര്‍ പുതിയ 2,000 നോട്ടിന്റെ പ്രത്യേകതകള്‍ വിശദീകരിച്ച്‌ സംസാരിച്ചത്. പുതിയ രണ്ടായിരത്തിന്റെയും അഞ്ഞൂറിന്റെയും നോട്ടുകളില്‍ നാനോ ടെക്നോളജി ഉപയോഗിക്കുന്നുണ്ടെന്നായിരുന്നു ശ്വേതയുടെ അവകാശവാദം. കറൻസിയില്‍ ഉപയോഗിച്ച ജി.പി.എസ് സംവിധാനം വഴി ആദായ നികുതി വകുപ്പിന് വിവരങ്ങള്‍ കൃത്യമായി അറിയാനാകുമെന്ന് വിഡിയോയില്‍ മാധ്യമപ്രവര്‍ത്തക ആധികാരികമായി വിവരിക്കുന്നുണ്ട്.സമാനമായ അവകാശവാദം സീ ന്യൂസ് എഡിറ്റര്‍ ഇൻ ചീഫ് സുധീര്‍ ചൗധരിയും നടത്തിയിരുന്നു. പുതിയ നോട്ടുകള്‍ നിര്‍മിക്കാൻ നാനോ സാങ്കേതികവിദ്യ ഉപയോഗിച്ചിട്ടുണ്ടെന്നായിരുന്നു സുധീര്‍ ചൗധരിയുടെ അവകാശവാദം. നാനോ ജി.പി.എസ് ചിപ്പുകള്‍ കറൻസികളില്‍ ഘടിപ്പിച്ചിട്ടുണ്ടാകും. സാറ്റ്ലൈറ്റ് വഴി ലൊക്കേഷൻ അടക്കമുള്ള വിവരങ്ങള്‍ ലഭിക്കും. കറൻസിയുടെ സീരിയല്‍ നമ്ബറടക്കം ട്രാക്ക് ചെയ്യാനാകുമെന്നും ചൗധരി വിവരിച്ചിരുന്നു.2,000 രൂപാ നോട്ടുകളുടെ വിനിമയം നിര്‍ത്തുന്നതായി റിസര്‍വ് ബാങ്ക് പ്രഖ്യാപിച്ചതിനു പിന്നാലെ ഇതേ വിഡിയോകള്‍ വീണ്ടും സോഷ്യല്‍ മീഡിയയില്‍ പ്രചരിച്ചിരുന്നു. ഇതിനിടെയാണ് ശ്വേതയെ നേരില്‍കണ്ട മാധ്യമപ്രവര്‍ത്തകൻ ഇതേക്കുറിച്ച്‌ ചോദിച്ചത്. 2,000 രൂപാ നോട്ടുകള്‍ ഘട്ടംഘട്ടമായി പിൻവലിക്കുമെന്നാണ് റിസര്‍വ് ബാങ്ക് പ്രഖ്യാപിച്ചത്. സെപ്റ്റംബര്‍ 30നകം 2,000 നോട്ടുകള്‍ മാറ്റിയെടുക്കാനുള്ള സമയം അനുവദിച്ചിട്ടുണ്ട്.