കറുകച്ചാലില് പങ്കാളികളെ കൈമാറ്റം ചെയ്ത കേസിലെ പരാതിക്കാരി കൊല്ലപ്പെട്ട സംഭവത്തില് ഭര്ത്താവ് വിഷം കഴിച്ച നിലയില്. കൊല്ലപ്പെട്ട മാലം സ്വദേശിനി ജൂബിയുടെ ഭര്ത്താവ് ഷിനോ മാത്യുവിനെയാണ് വിഷം കഴിച്ച നിലയില് കണ്ടെത്തിയത്. ഇയാളെ ചങ്ങനാശേരിയിലെ സ്വകാര്യ ആശുപത്രിയിലേക്ക് മാറ്റി.
ഷിനോയുടെ ആരോഗ്യ നില ഗുരുതരമാണെന്ന് പൊലീസ് അറിയിച്ചു.ഇന്ന് രാവിലെയാണ് ജൂബിയെ ഷിനോ വീട്ടില് കയറി ആക്രമിച്ചത്. ഗുരുതരമായി പരിക്കേറ്റ ജൂബിയെ ബന്ധുക്കളെത്തി ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ഭര്ത്താവാണ് തന്നെ ആക്രമിച്ചതെന്ന് ജൂബി ബന്ധുക്കളോട് പറഞ്ഞിരുന്നു. ഇയാളില് നിന്നും യുവതിക്ക് നിരന്തര ഭീഷണി ഉണ്ടായിരുന്നതായി ബന്ധുക്കള് പറഞ്ഞു. സംഭവത്തിന് പിന്നാലെ ഷിനോ ഒളിവില് പോയിരുന്നു.
നേരത്തെ യുവതി നല്കിയ പരാതിയില് ഭര്ത്താവ് അടക്കം 9 പേര്ക്കെതിരെ പൊലീസ് കേസ് എടുത്തിരുന്നു. 2014 ആയിരുന്നു പരാതിക്കാരിയുടെ വിവാഹം. വിദേശത്തായിരുന്ന ഭര്ത്താവ് നാട്ടില് തിരിച്ചെത്തിയ ശേഷം 2018 മുതലാണ് യുവതിയെ ഇത്തരം ബന്ധങ്ങള്ക്കു നിര്ബന്ധിച്ചു തുടങ്ങിയത്. ഭര്ത്താവിന്റെ പീഡനം സഹിക്കാനാവാതെ വന്നതോടെയാണ് യുവതി ദുരിതം തുറന്നു പറഞ്ഞത്.