ജോസഫ് ഗ്രൂപ്പ് നേതാവും കോട്ടയം ജില്ലാ പഞ്ചായത്ത് അംഗവുമായ ജോസ്മോൻ മുണ്ടക്കൽ ഇടതുമുന്നണിയിലേക്ക് എന്ന് ജോസ് കെ മാണി വിഭാഗത്തിന്റെ വ്യാജ പ്രചരണം; കെഎം മാണിയെ കള്ളനും കൊള്ളക്കാരനും ആക്കി ചിത്രീകരിച്ച ഇടതു മുന്നണിയോട് മാണി സാറിന്റെ യഥാർത്ഥ അനുയായികൾക്ക് ഒരിക്കലും സഹകരിക്കാൻ ആവില്ല എന്ന് തിരിച്ചടിച്ച് ജോസ്മോൻ: വിശദാംശങ്ങൾ വായിക്കാം.

രൂക്ഷ വാക്കുകളിൽ മറുപടിയും, നിയമ നടപടികൾ സ്വീകരിക്കുമെന്ന മുന്നറിയിപ്പും

ജോസ് കെ മാണി വിഭാഗം സൈബർ പോരാളികളുടെ വ്യാജ പ്രചരണം ശ്രദ്ധയിൽപ്പെട്ടപ്പോൾ തന്നെ രൂക്ഷമായ മറുപടിയാണ് ജോസ്മോൻ മുണ്ടയ്ക്കൽ ഫേസ്ബുക്കിലൂടെ നൽകിയത്. ജോസ് കെ മാണിയുടെ ഉറക്കം കെടുത്തുന്ന ജോസ് മോന്റെ പ്രസംഗങ്ങൾ പോലെ തന്നെ ജോസ് കെ മാണിക്കും പാർട്ടിക്കും ഉത്തരമില്ലാത്ത ന്യായീകരണം നിരത്താനാവാത്ത പല വിഷയങ്ങളും തന്റെ മറുപടിയിൽ ജോസ് മോൻ ഉൾപ്പെടുത്തി. ജോസ് മോൻ മുണ്ടക്കൽ നൽകിയ മറുപടിയുടെ പൂർണ്ണരൂപം ചുവടെ:

പ്രിയ സുഹൃത്തുക്കളെ, പതിനാലാം വയസ്സിൽ കെഎം മാണിയുടെ നേതൃത്വപാടവും രാഷ്ട്രീയവും പിന്തുടർന്നാണ് ഞാൻ വിദ്യാർത്ഥി പ്രസ്ഥാനത്തിലൂടെ പൊതുപ്രവർത്തന രംഗത്തേക്ക് കടന്നുവന്നത്. അന്നുമുതൽ ഇന്നുവരെ യുഡിഎഫിന്റെ ജനാധിപത്യ മൂല്യങ്ങളിലും, യുഡിഎഫിനോട് ചേർന്ന് നിന്ന് മാണിസാർ രൂപപ്പെടുത്തിയ കർഷകപക്ഷ, ജനപക്ഷ രാഷ്ട്രീയ പ്രത്യയശാസ്ത്രത്തിലും അടിയുറച്ചാണ് പ്രവർത്തിച്ചിട്ടുള്ളത്. കെഎം മാണി തന്റെ മരണം വരെയും യുഡിഎഫിന്റെ നേതാവും നായകനുമായിരുന്നു.

അദ്ദേഹത്തെ കള്ളനും, കൊള്ളക്കാരനും ആയി ചിത്രീകരിച്ചതും അഴിമതിക്കാരനായി മുദ്രകുത്തിയതും ഇടതുമുന്നണിയാണ്. അതുകൊണ്ടുതന്നെ മാണി സാറിൻറെ യഥാർത്ഥ ഒരു അനുയായിക്ക് ഒരു ന്യായീകരണത്തിന്റെ പേരിലും ഇടതുമുന്നണിയുടെ ഭാഗമാകുവാനോ, അവരോട് സഹകരിക്കുവാനും സാധിക്കില്ല എന്നതാണ് എന്റെ ഉത്തമമായ ബോധ്യം. ഈ ഉറച്ച ബോധ്യത്തിന്റെ അടിസ്ഥാനത്തിലാണ് ജോസ് കെ എം മാണിയുടെ നേതൃത്വത്തിൽ ഒരു വിഭാഗം ഇടതുമുന്നണിയിലേക്ക് പോയപ്പോൾ, പിജെ ജോസഫ് സാറിന്റെ നേതൃത്വത്തിൽ യുഡിഎഫിൽ ഞാൻ അടിയുറച്ചു നിന്നത്. വാശിയേറിയ തിരഞ്ഞെടുപ്പിൽ യുഡിഎഫ് പ്രതിനിധിയായി നിന്നാണ് ജില്ലാ പഞ്ചായത്തിലേക്ക് വിജയിച്ചു കയറിയത്.

രാഷ്ട്രീയ യാഥാർഥ്യങ്ങളെല്ലാം പൊതുജന സമക്ഷം ഉള്ളതാണ്. എന്നിരുന്നാലും വ്യാജ പ്രചരണവും, അപകീർത്തിപ്പെടുത്തലും ആണ് രാഷ്ട്രീയം എന്ന് വിശ്വസിക്കുന്ന ഒരു വിഭാഗം ഞാൻ യുഡിഎഫിന് വഞ്ചിച്ച് എൽഡിഎഫിലേക്ക് പോകുന്നു എന്ന് സമൂഹമാധ്യമങ്ങളിലൂടെ വ്യാപക പ്രചരണം നടത്തുന്ന സാഹചര്യത്തിലാണ് ഇത്തരത്തിൽ ഒരു കുറിപ്പ് ഇടേണ്ടി വരുന്നത്. ഇത് വ്യാജ പ്രചരണങ്ങൾക്കുള്ള മറുപടിയല്ല പൊതുജനത്തിനുള്ള വിശദീകരണമാണ്. ജോസ്മോൻ മുണ്ടക്കൽ എന്നും യുഡിഎഫിനൊപ്പം തന്നെയാണ് അതിനൊരു മാറ്റം ഉണ്ടാകണമെങ്കിൽ യുഡിഎഫ് കെഎം മാണിയെ തള്ളിപ്പറയുന്ന സാഹചര്യം ഉണ്ടാവണം. ഇത്തരം പ്രചാരണങ്ങൾ നടത്തുന്നത് ചില വ്യാജ ഐഡികൾ ഉപയോഗിച്ചാണ്. മുഖമില്ലാതെ ഇത്തരം വ്യാജപ്രചരണങ്ങളുമായി നടക്കുന്നവരെ നിയമത്തിന് മുന്നിലെത്തിക്കാൻ എന്നാൽ സാധ്യമാവുന്നതെല്ലാം ചെയ്യുമെന്നും ഈ സന്ദർഭത്തിൽ പറയാൻ ആഗ്രഹിക്കുന്നു.

ജോസ്മോൻ മുണ്ടക്കൽ.