കൊട്ടാരക്കര താലൂക്ക് ആശുപത്രിയില് യുവ ഡോക്ടറെ വൈദ്യപരിശോധനക്കെത്തിച്ചയാള് കുത്തിക്കൊന്ന സംഭവത്തില് വിവാദ പ്രതികരണവുമായി ആരോഗ്യമന്ത്രി വീണാ ജോര്ജ്. അക്രമം ഉണ്ടായപ്പോള് ഡോക്ടര് ഭയന്നെന്നും ഡോക്ടര് പരിചയ സമ്ബന്നയായിരുന്നില്ല, അതിനാല് ഓടിരക്ഷപ്പെടാന് കഴിഞ്ഞില്ലെന്നുമാണ് ആരോഗ്യമന്ത്രിയുടെ പ്രതികരണം.
‘ഡോക്ടര്മാരുടെ ആരോഗ്യനില തകര്ക്കുന്ന സംഭവമാണ് കൊട്ടാരക്കരയില് നടന്നത്. സാധാരണ മെഡിക്കല് കോളജിലാണ് പൊലീസ് എയ്ഡ് പോസ്റ്റുള്ളത്. കൊട്ടാരക്കര താലൂക്ക് ആശുപത്രിയില് എയ്ഡ് പോസ്റ്റുണ്ടായിരുന്നു. അവിടെ സിഎംഒയും ആരോഗ്യപ്രവര്ത്തകരും ഉണ്ടായിരുന്നു. കൊല്ലപ്പെട്ട യുവതി ഹൗസ് സര്ജനാണ്. അത്ര പരിചയമുള്ള ആളല്ല. ആക്രമണം ഉണ്ടായപ്പോള് ഭയന്നു എന്നാണ് അവിടെയുള്ള ഡോക്ടര്മാര് അറിയിച്ച വിവരം. വളരെ വിഷമകരമായ സംഭവമാണ്. ആരോഗ്യ പ്രവര്ത്തകര്ക്കെതിരെയുള്ള ആക്രമണങ്ങളില് അതിശക്തമായ നിലപാടാണ് സര്ക്കാര് സ്വീകരിക്കുന്നത്’ – വീണാ ജോര്ജ് പറഞ്ഞു.