കേരളത്തിലെ ലോകായുക്ത കെട്ടുകാഴ്ചയായി മാറിയെന്ന് കെപിസിസി അദ്ധ്യക്ഷന് കെ സുധാകരന്. മുഖ്യമന്ത്രി പ്രതിസ്ഥാനത്തു നില്ക്കുന്ന ദുരിതാശ്വാസനിധി തട്ടിപ്പ് കേസില് ഹിയറിംഗ് പൂര്ത്തിയായിട്ട് മാര്ച്ച് 18ന് ഒരു വര്ഷമാകുമ്ബോള് വിധി പറയാന് ലോകായുക്ത തയാറാകുന്നില്ല.
ഹിയറിംഗ് പൂര്ത്തിയായാല് ആറുമാസത്തിനകം വിധി പറയണമെന്ന സുപ്രീം കോടതി നിര്ദേശമൊന്നും കേരള ലോകായുക്തക്ക് ബാധകമല്ലയെന്നും സുധാകരന് കുറ്റപ്പെടുത്തി. ലോകായുക്തയുടെ ചിറകരിഞ്ഞ ബില് ദീര്ഘകാലമായി ഗവര്ണറുടെ മുമ്ബിലുണ്ടെങ്കിലും അദ്ദേഹവും അതിന്മേല് അടയിരിക്കുകയാണ്. സര്ക്കാരും ഗവര്ണറും ലോകായുക്തയും ചേര്ന്ന ത്രിമൂര്ത്തികള് കേരളത്തിന്റെ അഴിമതി വിരുദ്ധ പോരാട്ടത്തെ ഇല്ലാതാക്കിയെന്നു സുധാകരന് വിമര്ശിച്ചു.
സിപിഐഎം സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന്റെ പൈലറ്റ് വാഹനം അപകടത്തില്പ്പെട്ട് മരിച്ച പൊലീസുകാരന്റെ കുടുംബത്തിന് സര്ക്കാര് ആനുകുല്യങ്ങള്ക്കു പുറമെ 20 ലക്ഷം രൂപയും, ചെങ്ങന്നൂര് എംഎല്എ ആയിരുന്ന അന്തരിച്ച കെ കെ രാമചന്ദ്രന്നായരുടെ മകന് എന്ജിനീയറായി ജോലിക്കു പുറമെ സ്വര്ണ, വാഹനവായ്പകള് തിരിച്ചടയ്ക്കുന്നതിന് 9 ലക്ഷം രൂപയും, അന്തരിച്ച എന്സിപി നേതാവ് ഉഴവൂര് വിജയന്റെ കുടുംബത്തിന് വിദ്യാഭ്യാസ ചെലവ് ഉള്പ്പെടെ 25 ലക്ഷം രൂപയും മുഖ്യമന്ത്രിയുടെ ദുരിതാശ്വാസനിധിയില് നിന്ന് എല്ലാ നിയമങ്ങളും കാറ്റില്പ്പറത്തി അനുവദിച്ച അഴിമതിയാണ്.
രോഗം, അപകടങ്ങള്, പ്രകൃതിദുരന്തങ്ങള് തുടങ്ങിയവയ്ക്കാണ് ദുരിതാശ്വാസനിധിയില് നിന്ന് ധനസഹായം. മുന് സിന്ഡിക്കേറ്റ് അംഗം ആര് എസ് ശശികുമാറിന്റെ ഇതു സംബന്ധിച്ച ഹര്ജി പ്രസക്തമാണെന്ന് ലോകായുക്ത തുറന്നു സമ്മതിച്ചെങ്കിലും ഒരു വര്ഷമായിട്ടും വിധി പറയാത്തത് മുഖ്യമന്ത്രിയെ ഭയന്നാണോയെന്ന് വിമര്ശനമുണ്ട്.