കൗൺസിലർ കാലുമാറാൻ വിസമ്മതിച്ചു: ജോസ് കെ മാണിയുടെ പ്രതികാരം അംഗൻവാടി കുട്ടികളോട്; ജോസിന് സദ്ബുദ്ധി തോന്നാൻ കെഎം മാണിയുടെ പ്രതിമയ്ക്ക് മുന്നിൽ ഉപവാസം പ്രഖ്യാപിച്ചു കൗൺസിലറും.

രാഷ്ട്രീയ പ്രതികാരത്തിന് കുരുന്നുകളെ കരുവാക്കുന്നു:

അംഗൻവാടി വിഷയം അടിയന്തര പ്രാധാന്യത്തോടെ കൈകാര്യം ചെയ്യണമെന്ന് ആവശ്യപ്പെട്ട് പുതിയ നഗരസഭാ ചെയർപേഴ്സൺ അധികാരം ഏറ്റപ്പോൾ കത്ത് നൽകുകയും ഇതുമായി ബന്ധപ്പെട്ട സ്പെഷ്യൽ കൗൺസിൽ യോഗം ഇന്ന് ( 28/01/2023) ചേരാൻ നിശ്ചയിക്കുകയും ചെയ്തു. എന്നാൽ കേവലമായ രാഷ്ട്രീയ പ്രതികാരം തീർക്കുവാൻ കേരള കോൺഗ്രസ് പാർട്ടി ചെയർമാൻ ജോസ് കെ മാണി നേരിട്ട് ഇടപെടുകയും സ്പെഷ്യൽ കൗൺസിൽ മാറ്റിവെക്കുകയും ചെയ്തു.

രാഷ്ട്രീയ വഞ്ചന കാണിച്ച് കൂറുമാറ്റം നടത്താൻ തയ്യാറാകാതിരുന്ന കൗൺസിലറോടുള്ള വിരോധം തീർക്കുവാൻ അംഗൻവാടിയിലെ കുട്ടികളെ ബലിയാടാക്കുന്ന നിലപാടിനെതിരെ കടുത്ത വിദ്വേഷമാണ് ഭരണമുന്നണിയിൽ തന്നെ ഉയർന്നിരിക്കുന്നത്. ജനങ്ങളെ വെല്ലുവിളിക്കുകയും വെറുപ്പിക്കുകയും ചെയ്യുന്ന കേരള കോൺഗ്രസ് നിലപാടുകൾക്കെതിരെ സിപിഎമ്മിലും സിപിഐയിലും അതൃപ്തി ശക്തമാവുകയാണ്. ജനകീയ വിഷയത്തിൽ പ്രതിപക്ഷവും ഭരണപക്ഷവും കേരള കോൺഗ്രസിനെതിരെ ഒന്നിക്കാനുള്ള സാധ്യതകളും നിലനിൽക്കുന്നു.

ജോസ് കെ മാണിക്ക് സദ്ബുദ്ധി തോന്നാൻ കെഎം മാണിയുടെ പ്രതിമയ്ക്ക് മുന്നിൽ പ്രതിപക്ഷ കൗൺസിലറുടെ ഉപവാസം

രാഷ്ട്രീയ പ്രതികാരം തീർക്കുവാൻ പിഞ്ചുകുഞ്ഞുങ്ങളെ പോലും വെറുതെ വിടാത്ത ജോസ് കെ മാണിക്കും അദ്ദേഹത്തിന്റെ പാർട്ടിക്കും സത്ബുദ്ധി തോന്നാൻ കെഎം മാണിയുടെ പ്രതിമയ്ക്ക് മുന്നിൽ ഉപവാസം പ്രഖ്യാപിച്ചിരിക്കുകയാണ് ജോസഫ് ഗ്രൂപ്പ് നേതാവും കൗൺസിലറുമായ ജോസ് ഇടേട്ട്. 31 ആം തീയതിയാണ് ഉപവാസം സംഘടിപ്പിച്ചിരിക്കുന്നത്. കൗൺസിലർ തനിക്ക് അനുകൂലമായി കാലു മാറിയാൽ മാത്രമേ പിഞ്ചുകുഞ്ഞുങ്ങൾക്ക് സുരക്ഷിതമായ അംഗൻവാടി അനുവദിക്കൂ എന്ന നിലപാട് രാഷ്ട്രീയ പാപ്പരത്വവും ജനാധിപത്യത്തോടുള്ള വെല്ലുവിളിയും ആണെന്ന് ജോസഫ് ഗ്രൂപ്പ് നേതാക്കൾ ചൂണ്ടിക്കാട്ടി

representative image