കോണ്‍ഗ്രസ് അധ്യക്ഷ തിരഞ്ഞെടുപ്പില്‍ മല്ലികാര്‍ജുന്‍ ഖാര്‍ഗെയോട് പരാജയപ്പെട്ട ശശി തരൂരിനെ അഭിനന്ദിച്ച്‌ കെപിസിസി പ്രസിഡന്‍റ് കെ സുധാകരന്‍. മത്സരത്തില്‍ തരൂര്‍ മാന്യത കാട്ടിയെന്നും സുധാകരന്‍ പറഞ്ഞു. വാക്കുകള്‍ കൊണ്ട് പോലും അദ്ദേഹം വേദനിപ്പിച്ചില്ല. തരൂരിനോട് യാതൊരു ശത്രുതയുമില്ലെന്നും സുധാകരന്‍ വ്യക്തമാക്കി.
“തരൂരിനെ ഉള്‍ക്കൊണ്ട് തന്നെ മുന്നോട്ട് പോകും. അദ്ദേഹത്തിന് അര്‍ഹമായ സ്ഥാനം പാര്‍ട്ടി നല്‍കും എന്നാണ് വിശ്വാസം. അത് നേതൃത്വത്തോട് ആവശ്യപ്പെടും. പാര്‍ട്ടിയുടെ തെരഞ്ഞെടുപ്പ് സംവിധാനം മികച്ചതാണെന്ന് തെളിഞ്ഞിരിക്കുകയാണ്, അതുകണ്ട് മറ്റുള്ളവര്‍ ഞെട്ടിയിരിക്കുകയാണ്”. സുധാകരന്‍ പ്രതികരിച്ചു.
“തെരഞ്ഞെടുപ്പ് നടന്നാല്‍ ഒരാള്‍ ജയിക്കും ഒരാള്‍ തോല്‍ക്കും. അത് സ്വാഭാവികമാണ്. ഖാര്‍ഗെ ജയിച്ചതിലും തരൂര്‍ തോറ്റതിലും ഞങ്ങള്‍ക്ക് സന്തോഷമോ ദുഃഖമോ ഇല്ല. സന്തോഷം ഉള്ളത് ജനാധിപത്യപരമായ തെരഞ്ഞെടുപ്പ് നടന്നതിലാണ്. വ‍ര്‍ഷങ്ങള്‍ക്ക് ശേഷമാണ് അത് നടക്കുന്നത്. അതില്‍ സന്തോഷം കൊണ്ട് തുള്ളിച്ചാടുകയാണ് ഞങ്ങള്‍ ഒരോരുത്തരും”. അദ്ദേഹം കൂട്ടിച്ചേര്‍ത്തു.
