എല്ദോസ് കുന്നപ്പിള്ളി എംഎല്എയ്ക്കെതിരായ പീഡനപരാതിയില് മാതൃകപരമായ തീരുമാനമെടുക്കുമെന്ന് പ്രതിപക്ഷ നേതാവ് വി ഡി സതീശന്. കോഴിക്കോട് ചിന്തന് ശിവിരത്തില് പ്രഖ്യാപിച്ചത് പോലെ സ്ത്രീപക്ഷ നിലപാടുകളില് മാറ്റം വരുത്തില്ലെന്നും അദ്ദേഹം പറഞ്ഞു. എല്ദോസില് നിന്നും വിശദീകരണം തേടും.
സിപിഐഎം ചെയ്യുന്നത് പോലെ കമ്മീഷനെ വെച്ച് ആരോപിതനെ കുറ്റവിമുക്തനാക്കില്ലെന്നും വി ഡി സതീശന് പറഞ്ഞു.വാര്ത്തകളില് വരുന്നത് പോലെ കെപിസിസി തീരുമാനം എടുക്കുന്നില്ലെന്ന് പറയുന്നത് ശരിയല്ലെന്നും വി ഡി സതീശന് പറഞ്ഞു. എല്ദോസ് എത്രയും പെട്ടന്ന് കെപിസിസിയുമായി ബന്ധപ്പെടണമെന്നും പ്രതിപക്ഷ നേതാവ് ആവശ്യപ്പെട്ടു. അദ്ദേഹവുമായി ബന്ധപ്പെട്ട എല്ലാ ഇടങ്ങളിലും അറിയിച്ചിട്ടുണ്ട്. എത്രയും പെട്ടന്ന് വിശദീകരണം നല്കണമെന്നും സതീശന് വ്യക്തമാക്കി.
അതേസമയം, എല്ദോസ് കുന്നപ്പള്ളിക്കെതിരായ നടപടിക്ക് തന്റെ അനുമതി വേണ്ടെന്ന് സ്പീക്കര് എ എന് ഷംസീര് അറയിച്ചു. നിയമത്തിന് മുന്നില് എല്ലാവരും തുല്യരാണ്. ജനപ്രതിനിധികള് പാലിക്കേണ്ട ചില കാര്യങ്ങളുണ്ട് അത് പാലിച്ചില്ലെങ്കില് നിയമം നിയമത്തിന്റെ വഴിക്ക് പോകും. അതിന് സ്പീക്കര് തടസമാകില്ലെന്നും അദ്ദേഹം പ്രതികരിച്ചു.
യുവതിയുടെ പരാതിയില് എല്ദോസ് കുന്നപ്പിള്ളിയെ അറസ്റ്റ് ചെയ്യാനുള്ള നടപടികളുമായാണ് ക്രൈബ്രാഞ്ച് സംഘം മുന്നോട്ട് പോകുന്നത്. ജനപ്രിതിനിധിയായതിനാല് തുടര് നടപടിക്കുള്ള അനുമതി തേടി തിരുവനന്തപുരം സിറ്റി കമ്മീഷണര് സ്പീക്കര്ക്ക് കത്ത് നല്കിയെന്ന വിവരം നേരത്തെ പുറത്ത് വന്നിരുന്നു. എല്ദോസിനെതിരെ ബലാത്സംഗ കേസ് കൂടി രജിസ്റ്റര് ചെയ്ത സാഹചര്യത്തിലാണ് നടപടി വേഗത്തിലാക്കുന്നത്.
ക്രൈംബ്രാഞ്ച് ചുമത്തിയ 376 (2) എന് വകുപ്പ് പ്രകാരം ചുരുങ്ങിയത് പത്തുവര്ഷം തടവുശിക്ഷ വരെ എല്ദോസിന് ലഭിക്കാം. നാളെയാണ് എല്ദോസിന്റെ മുന്കൂര് ജാമ്യാപേക്ഷ ജില്ലാ സെഷന്സ് കോടതി പരിഗണിക്കുന്നത്. യുവതിയുടെ രഹസ്യമൊഴി രേഖപ്പെടുത്താനുള്ള അപേക്ഷ ഇന്ന് അന്വേഷണസംഘം കോടതിയില് നല്കും.