മഞ്ജു വാര്യര്‍ പ്രധാന വേഷത്തിലെത്തുന്ന ആയിഷയിലെ ഗാനം പുറത്ത്. കണ്ണില് കണ്ണില് എന്നാരംഭിക്കുന്ന ഗാനത്തിന്റെ ലിറിക്കല്‍ വിഡിയോ ആണ് പുറത്തുവന്നിരിക്കുന്നത്. ലൊക്കേഷന്‍ ദൃശ്യങ്ങള്‍ കൂടി ഉള്‍പ്പെടുത്തിക്കൊണ്ടാണ് ഗാനമെത്തുന്നത്.
പ്രഭുദേവ നൃത്ത സംവിധാനം നിര്‍വഹിക്കുന്ന ഗാനത്തില്‍ മനോഹരമായ നൃത്തരംഗങ്ങളാണ് ഉള്ളത്. മഞ്ജു വാര്യരെ ഡാന്‍സ് പഠിക്കുന്ന പ്രഭുദേവയാണ് വിഡിയോയിലെ പ്രധാന ആകര്‍ഷണം.
ജയചന്ദ്രന്‍ സംഗീത സംവിധാനം നിര്‍വഹിക്കുന്ന ഗാനം മലയാളം, അറബി, ഇംഗ്ലീഷ് ഭാഷകളിലായാണ് ഒരുക്കിയിരിക്കുന്നത്. ബി കെ ഹരിനാരായണന്‍ ആണ് മലയാളം വരികള്‍ എഴുതിയത്. അറബിക് വരികള്‍ എഴുതിയിരിക്കുന്നത് ഡോ. നൂറ അല്‍ മര്‍സൂഖിയാണ്. അഹി അജയനാണ് പാടിയിരിക്കുന്നത്.
ഇന്തോ- അറബിക് ചിത്രമാണ് ആയിഷ. നവാഗതനായ ആമിര്‍ പള്ളിക്കല്‍ സംവിധാനം ചെയ്യുന്ന ചിത്രം മലയാളത്തിനു പുറമെ ഇംഗ്ലീഷ്, അറബി, തമിഴ്, തെലുങ്ക്, ഹിന്ദി, കന്നഡ ഭാഷകളിലുമായാണ് പ്രദര്‍ശനത്തിനെത്തുക. വന്‍ ബജറ്റിലാണ് ചിത്രം ഒരുങ്ങുന്നത്. രാധിക ഈ ചിത്രത്തില്‍ സുപ്രധാന വേഷം അവതരിപ്പിക്കുന്നു. സജ്ന, പൂര്‍ണിമ, ലത്തീഫ (ടുണീഷ്യ), സലാമ (യുഎഇ), ജെന്നിഫര്‍ (ഫിലിപ്പൈന്‍സ്), സറഫീന (നൈജീരിയ), സുമയ്യ (യമന്‍), ഇസ്ലാം (സിറിയ) തുടങ്ങിയ വിദേശതാരങ്ങളും അണിനിരക്കുന്നു.
