കോഴിക്കോട്: പന്ത്രണ്ടുകാരിയായ പെണ്കുട്ടിയുടെ ശരീരത്തില് ചട്ടുകം ചൂടാക്കി പൊള്ളിച്ച കേസില് ഡോക്ടറുടേയും ഭാര്യയുടേയും ജാമ്യാപേക്ഷ തള്ളി. കോഴിക്കോട്ടെ സ്വകാര്യ ആശുപത്രിയിലെ ഡോക്ടറായിട്ടുള്ള അലിഗഡ് സ്വദേശി ഡോ. മിന്സ മുഹമ്മദ് കമ്രാന് (40), ഭാര്യ റുമാന (30) എന്നിവരാണ് ജയിലിലായത്. ഇരുവരേയും 14 ദിവസത്തേക്ക് റിമാന്ഡ് ചെയ്തു.
പന്തീരാങ്കാവില് വീട്ടു ജോലിക്ക് നിര്ത്തിയ പെണ്കുട്ടിയെ ക്രൂരമായി മര്ദ്ദിക്കുകയും ചട്ടുകം ചൂടാക്കി പൊള്ളിക്കുകയും ചെയ്യുകയായിരുന്നു. ബീഹാര് സ്വദേശിനിയായ പെണ്കുട്ടിക്കാണ് മര്ദനമേറ്റത്. ശിശുരോഗ വിദഗ്ധനായതിനാലും രാത്രി വീട്ടില് നാല് മക്കള് തനിച്ചാണെന്നതിനാലും ഇന്നലെ രാത്രി ഇവര്ക്ക് ഇടക്കാല ജാമ്യം അനുവദിച്ചിരുന്നു.
ഇന്ന് കേസ് വീണ്ടും പരിഗണിച്ച മജിസ്ട്രേട്ട് കോടതി ജാമ്യാപേക്ഷ തള്ളുകയായിരുന്നു. അന്യായമായി കുട്ടിയെ കടത്തിക്കൊണ്ടുവന്നു, തടങ്കലില് പാര്പ്പിച്ചു, ചട്ടുകവും സ്പൂണും ചൂടാക്കി പൊള്ളിച്ചു തുടങ്ങിയ കുറ്റങ്ങളാണ് ഇവര്ക്കെതിരെയുള്ളത്. നിലവില് കുട്ടി ശിശുക്ഷേമ സമിതിയുടെ സംരക്ഷണത്തിലാണ്.
നാല് വര്ഷമായി കോഴിക്കോട് താമസിച്ചുവരികയാണ് ഡോക്ടറും ഭാര്യയും. ബിഹാര് സ്വദേശിനിയായ പെണ്കുട്ടിയുടെ അമ്മ മരിച്ചതിനെ തുടര്ന്ന് കഴിഞ്ഞ മെയ് മാസത്തിലാണ് കുട്ടി കോഴിക്കോട് വീട്ടുജോലിക്ക് എത്തിയത്. ഡോക്ടര് വീട്ടിലില്ലാത്ത നേരം നോക്കിയാണ് ഭാര്യ അക്രമം നടത്തിയിരുന്നത്. സ്ഥിരമായി ചട്ടുകം ചൂടാക്കി കൈകളിലും മുഖത്തും ഉള്പ്പെടെ പൊള്ളിക്കുകയും കത്തികൊണ്ട് മുറിവേല്പ്പിക്കുകയും ചെയ്യുമായിരുന്നു. കുട്ടിയുടെ ശരീരം മുഴുവന് പൊള്ളലേറ്റതിന്റെയും മുറിവേല്പ്പിച്ചതിന്റെയും പാടുകളുണ്ട്.
രഹസ്യവിവരം ലഭിച്ചതിന്റെ അടിസ്ഥാനത്തില് നടത്തിയ പരിശോധനയിലാണ് ഇവരെ പിടികൂടിയത്. ചൈല്ഡ് വെല്ഫെയര് കമ്മിറ്റിക്ക് പെണ്കുട്ടി മൊഴി നല്കിയിട്ടുണ്ട്. ചൈല്ഡ് ലൈന് പ്രവര്ത്തകരെത്തി കുട്ടിയെ വെള്ളിമാടുകുന്ന് ബാലികാ മന്ദിരത്തിലേക്ക് മാറ്റി. ഡോക്ടറുടെ ഭാര്യ റുമാനയാണ് തന്നെ മര്ദിച്ചതെന്നാണ് കുട്ടിയുടെ മൊഴി.