തൃശ്ശൂര്: എല്ഡിഎഫ് ഭരിക്കുന്ന തൃശ്ശൂര് കാട്ടൂര് പഞ്ചായത്ത് പ്രസിഡന്റിന്റെയും സെക്രട്ടറിയുടെയും ജീവനക്കാരുടേയും കള്ള്ഷാപ്പ് സല്ക്കാരം വിവാദമായിരിക്കുകയാണ്. ഷാപ്പിലിരിന്ന് കള്ള് കുടിക്കുന്നതിന്റെ സെല്ഫി ചിത്രമാണ് പ്രചരിക്കുന്നത്. ഇവര് തന്നെ സാമൂഹ്യ മാധ്യമത്തില് പങ്കുവച്ച ഫോട്ടായാണ് വിവാദമായിരിക്കുന്നത്.
ഇന്ന് നടന്ന പഞ്ചായത്ത് യോഗത്തില് നിന്ന് പ്രതിപക്ഷമായ കോണ്ഗ്രസ് അംഗങ്ങള് ഇറങ്ങിപോയി. പ്രസിഡന്റിന്റെ രാജി ആവശ്യപ്പെട്ടാണ് കോണ്ഗ്രസ് കാട്ടൂര് പഞ്ചായത്ത് മെമ്ബര്മാര് രാവിലെ നടന്ന പഞ്ചായത്ത് കമ്മിറ്റിയില് നിന്നും ഇറങ്ങിപോയത്. ബി ജെ പി പ്രവര്ത്തകര് കാട്ടൂര് പഞ്ചായത്ത് ഓഫിസിലേക്ക് മാര്ച്ചും ധര്ണ്ണയും നടത്തി.
കഴിഞ്ഞ ദിവസമാണ് പഞ്ചായത്ത് പ്രസിഡന്റും സെക്രട്ടറിയും പഞ്ചായത്തിലെ ചില ഉദ്യോഗസ്ഥരും കള്ള് ഷാപ്പില് ഇരിക്കുന്ന ഫോട്ടോ സോഷ്യല് മീഡിയയില് വ്യാപകമായി പ്രചരിച്ചത്. ഇതിനെതിരെ സെക്രട്ടറി പൊലീസില് പരാതിയും നല്കിയിട്ടുണ്ട്.