കോഴിക്കോട്: മൂന്നു പേരെ കൊലപ്പെടുത്തിയ ശേഷം നാടുവിട്ട ബംഗാള് സ്വദേശി കോഴിക്കോട് നിന്നും പിടിയിലായ സംഭവത്തില് കൂടുതല് വിവരങ്ങള് പുറത്ത്. പിടിയിലായ പശ്ചിമ ബംഗാള് സ്വദേശി രവികുള് സര്ദാര് കൊടുംകുറ്റവാളിയെന്ന് പോലീസ് പറഞ്ഞു. തൃണമൂല് കോണ്ഗ്രസിന്റെ കൗണ്സിലറെ കൊലപ്പെടുത്തുകയും ഇത് കണ്ട രണ്ട് ദൃക്സാക്ഷികളെയും വധിച്ച ശേഷമാണ് ഇയാള് കേരളത്തിലെത്തിയത്.
കഴിഞ്ഞ മാസം ആറിനാണ് പശ്ചിമ ബംഗാളിലെ പര്ഗാനാസില്വച്ച് കൗണ്സിലറെ ഇയാള് വെടിവച്ചു വീഴ്ത്തിയശേഷം വെട്ടിക്കൊലപ്പെടുത്തിയത്. അബദ്ധവശാല് കൊലപാതകം കാണാനിടയായ രണ്ട് പേരെയും കൊലപ്പെടുത്തിയശേഷമാണ് ഇയാള് കേരളത്തിലേയ്ക്ക് കടന്നത്. കോഴിക്കോട് മീന്ചന്തയ്ക്ക് സമീപം അന്യ സംസ്ഥാന തൊഴിലാളികളുടെ വാസസ്ഥലത്ത് ഇയാള് അഭയം പ്രാപിക്കുകയായിരുന്നു. ഇയാളെ ഒളിവില് കഴിയാന് സഹായിച്ച മൂന്നു പേരെയും പോലീസ് കസ്റ്റഡിയിലെടുത്തെങ്കിലും ഇവര്ക്കെതിരെ കേസെടുത്തിട്ടില്ല. പന്ന്യങ്കര പോലീസിന്റെ സഹായത്തോടെ പശ്ചിമ ബംഗാള് പോലീസാണ് ഇയാളെ അറസ്റ്റ് ചെയ്തത്.