ആദായ നികുതി റിട്ടേൺ (ഐടിആർ) ഫയൽ ചെയ്യുന്നതിനുള്ള അവസാന തീയതി ജൂലൈ 31 ഞായറാഴ്ചയായിരുന്നു. 2022-23 വർഷത്തേക്കുള്ള ഐടിആർ ഫയൽ ചെയ്യുന്നതിനുള്ള അവസാന തീയതി ആദായ നികുതി വകുപ്പോ സർക്കാരോ നീട്ടിയിട്ടില്ല. എന്നാൽ പറഞ്ഞ സമയത്തിനുള്ളിൽ ഐടിആർ ഫയൽ ചെയ്യാൻ കഴിയാത്തവർക്ക് ഇപ്പോഴും അതിനുള്ള അവസരമുണ്ട്.
ചില കാരണങ്ങളാൽ നികുതിദായകർക്ക് നിശ്ചിത തീയതിക്കുള്ളിൽ ഐടിആർ ഫയൽ ചെയ്യാൻ കഴിയുന്നില്ലെങ്കിൽ ”ബിലേറ്റഡ് ഐടിആർ” വഴി ഇത് ചെയ്യാം. എന്നാൽ ഗവൺമെന്റ് ഫിനാൻസ് ആക്ടിലെ വ്യവസ്ഥകൾ പ്രകാരം ഐടിആർ വൈകി ഫയൽ ചെയ്യുന്നതിന് പിഴ അടയ്‌ക്കേണ്ടതുണ്ട്.
എന്താണ് ബിലേറ്റഡ് ഐടിആർ?
ജൂലൈ 31-നകം ഐടി റിട്ടേണുകൾ ഫയൽ ചെയ്യാൻ കഴിയാത്ത നികുതിദായകർക്ക് ബിലേറ്റഡ് ഐടിആർ എന്ന ഓപ്ഷൻ വഴി ഡിസംബർ 31 വരെ ഫയൽ ചെയ്യാം. നികുതിദായകരെ നിശ്ചിത തീയതിക്ക് ശേഷം ആദായ നികുതി റിട്ടേൺ സമർപ്പിക്കാൻ അനുവദിക്കുന്ന വ്യവസ്ഥയാണിത്.
നികുതി റിട്ടേൺ സമർപ്പിക്കാൻ വൈകിയാൽ ആദായനികുതി നിയമത്തിലെ സെക്ഷൻ 234 എഫ് പ്രകാരം ചാർജ് ഈടാക്കും. കാലതാമസത്തിനനുസരിച്ച് ഇത് വർദ്ധിക്കും. സെക്ഷൻ 234F പ്രകാരം, 5 ലക്ഷം രൂപയോ അതിൽ കൂടുതലോ വരുമാനമുള്ള നികുതിദായകർ ജൂലൈ 31 ന് ശേഷം ITR ഫയൽ ചെയ്താൽ 5,000 രൂപ പിഴ അടയ്‌ക്കേണ്ടി വരും. എന്നിരുന്നാലും, മൊത്തം വരുമാനം 5 ലക്ഷം രൂപയിൽ താഴെയുള്ള നികുതിദായകർക്ക് 1000 രൂപയാണ് പിഴ. അതേസമയം ആദായനികുതി അടയ്ക്കുന്നതിൽ നിന്ന് ഒഴിവാക്കപ്പെട്ടവർ പിഴയൊന്നും അടക്കേണ്ടതില്ല.
ഒറിജിനൽ ടാക്സ് റിട്ടേൺ ഫയൽ ചെയ്യുന്നതിൽ എന്തെങ്കിലും തെറ്റുണ്ടെങ്കിൽ ആദായ നികുതി റിട്ടേൺ ഫയൽ ചെയ്യുന്നവർക്കും പുതുക്കിയ ആദായ നികുതി റിട്ടേൺ സമർപ്പിക്കാൻ അർഹതയുണ്ട്. ഇതിനുള്ള അവസാന തീയതി 2022 ഡിസംബർ 31 ആണ്. ആദായനികുതി ഓഗസ്റ്റ് 1 നും ഡിസംബർ 31 നും ഇടയിൽ ബിലേറ്റഡ് ഐടിആർ വഴി ഫയൽ ചെയ്യാം. എന്നാൽ ഈ അവസരം നഷ്ടമായാൽ ആദായനികുതി വകുപ്പിന്റെ നോട്ടീസ് ലഭിക്കാതെ അവർക്ക് ആദായനികുതി അടക്കാനാകില്ല.
ഇതുവരെ അടച്ച ആദായ നികുതി
ജൂലൈ 31ന് 72.42 ലക്ഷം ആദായനികുതി റിട്ടേണുകൾ ഫയൽ ചെയ്തു. ആകെ 5.83 ആദായനികുതി റിട്ടേണുകൾ ഫയൽ ചെയ്തു. കഴിഞ്ഞ വർഷത്തെ ആദായനികുതി വരുമാനത്തിന് അടുത്താണിത്. തുടക്കത്തിൽ ആദായനികുതി റിട്ടേൺ (ഐടിആർ) ഫയൽ ചെയ്യുന്നത് മന്ദഗതിയിലായിരുന്നുവെങ്കിലും, സമയപരിധി അടുത്തപ്പോൾ കൂടുതൽ ആളുകൾ മുന്നോട്ട് വന്നു.
“ഐടിആർ ഫയലിംഗിൽ കുതിച്ചുചാട്ടം ഉണ്ടായിട്ടുണ്ട്, ഒറ്റ ദിവസം കൊണ്ട് 72.42 ലക്ഷം ഐടിആറുകൾ ഫയൽ ചെയ്തു, 2022-23 മൂല്യനിർണ്ണയ വർഷത്തിൽ ജൂലൈ 31 വരെ സമർപ്പിച്ച മൊത്തം ഐടിആറുകൾ ഏകദേശം 5.83 കോടിയാണ്”- ഔദ്യോഗിക പ്രസ്താവനയിൽ പറയുന്നു.
അതേസമയം, കഴിഞ്ഞ രണ്ട് സാമ്പത്തിക വർഷങ്ങളിൽ, കോവിഡ് പാൻഡെമിക് കാരണം നികുതിദായകർക്ക് ഐടിആർ ഫയൽ ചെയ്യുന്നതിനുള്ള സമയപരിധി സർക്കാർ നീട്ടിയിരുന്നു. എന്നാൽ ഈ വർഷം സമയപരിധി നീട്ടിയിട്ടില്ല. ഐടിആർ ഫയൽ ചെയ്യുന്നത് ഒരു വ്യക്തി വർഷത്തിൽ ആദായനികുതി വകുപ്പിന് അടയ്‌ക്കേണ്ട വരുമാനത്തെയും നികുതികളെയും കുറിച്ചുള്ള വിവരങ്ങൾ നൽകുന്നാണ്.
