ഇ.പി ജയരാജന്റെ ട്രെയിന് യാത്രയ്ക്ക് പരോക്ഷ പിന്തുണയുമായി കേരള റെയില് ഡെവലപ്പ്മെന്റ് കോര്പ്പറേഷന് ലിമിറ്റഡ്. അല്ലെങ്കിലും ട്രെയിന് യാത്ര തന്നെയാണ് സെയ്ഫ്, സില്വര്ലൈന് വരും, യാത്രാശീലങ്ങള് മാറും എന്ന ക്യാപ്ഷനോടെ കെ റെയിലിന്റെ ഔദ്യോഗിക ഫെയ്സ്ബുക്ക് പേജിലാണ് പുതിയ പോസ്റ്റ് പ്രത്യക്ഷപ്പെട്ടിരിക്കുന്നത്. കെ റെയില് വന്നാല് ഇന്ഡിഗോയുടെ ആപ്പീസ് പൂട്ടുമെന്ന പരാമര്ശം കഴിഞ്ഞ ദിവസം ഇ.പി ജയരാജന് നടത്തിയിരുന്നു.
ട്രെയിന് യാത്രയുടെ ഗുണങ്ങള് ചൂണ്ടിക്കാട്ടിയാണ് കെ റെയില് ഫെയ്സ്ബുക്ക് പോസ്റ്റിട്ടിരിക്കുന്നത്. ഏറ്റവും കുറവ് അപകടനിരക്ക്, കുറഞ്ഞ യാത്രാനിരക്ക്, പുനരുപയോഗ ഊര്ജ്ജത്തിന്റെ പരമാവധി വിനിയോഗം, ഇന്ധന ചെലവ് കുറവ്, സുരക്ഷിതം, പരിസ്ഥിതി സൗഹൃദം തുടങ്ങിയ കാര്യങ്ങളാണ് കെ റെയില് ഫെയ്സ്ബുക്ക് പോസ്റ്റിലൂടെ ചൂണ്ടിക്കാട്ടുന്നത്.
ഇന്ഡിഗോ ബഹിഷ്ക്കരിക്കുമെന്ന് എല്.ഡി.എഫ് കണ്വീനര് ഇ.പി ജയരാജന് വ്യക്തമാക്കിയ പശ്ചാത്തലത്തില് ഇന്ഡിഗോ എയര്ലൈന്സിന്റെ ഒഫീഷ്യല് ഫെയ്സ്ബുക്ക്പേജില് വന്ന പുതിയ പോസ്റ്റിന് താഴെ ട്രോള് കമന്റുകളുമായി മലയാളികളെത്തി. ഇന്ഡിഗോ എയര്ലൈന്സിന്റെ വിമാനം ഒരു റെയില്വേ ലൈനിന്റെ മുകളിലൂടെ പറന്നുപൊങ്ങുന്ന ചിത്രമാണ് അവര് ഫെയ്സ് ബുക്ക് പേജില് പോസ്റ്റ് ചെയ്തത്. ഈ ചിത്രത്തിന് താഴെയാണ് ഇ.പി ജയരാജനെ ട്രോളിക്കൊണ്ടുള്ള കമന്റുകള് നിറയുന്നത്.