സൗരോർജത്തിൽ പ്രവർത്തിക്കുന്ന ഒരു കാർ നിർമ്മിച്ചിരിക്കുകയാണ് ശ്രീനഗർ സനത് നഗർ സ്വദേശിയായ ബിലാൽ അഹമ്മദ്. പതിനൊന്നു വർഷമാണ് തന്റെ സ്വപ്നകാർ നിർമ്മിക്കുവാൻ ബിലാലിന് വേണ്ടിവന്നത്. 15 ലക്ഷം രൂപയാണ് ഗണിത അധ്യാപകൻ കൂടിയായ ബിലാലിന് മുടക്കേണ്ടി വന്നത്. ‘ഞാൻ ഈ പദ്ധതി ആരംഭിച്ചപ്പോഴും അത് പൂർത്തിയാക്കിയ ശേഷവും ആരും എനിക്ക് സാമ്പത്തിക സഹായം നൽകിയില്ല. എന്നെ പിന്തുണച്ചിരുന്നെങ്കിൽ ഒരുപക്ഷേ ഞാൻ ഇന്ത്യയുടെ ഇലോൺ മസ്‌ക് ആകുമായിരുന്നു’. ബിലാൽ പറയുന്നു.
കാറുകളെ എന്നും സ്നേഹിച്ചിരുന്ന ഒരു വ്യക്തികൂടിയാണ് ഇദ്ദേഹം. ബാക്ക് ടു ദ ഫ്യൂച്ചർ എന്ന സിനിമയിൽ കണ്ട ഡെലോറിയൻ കാറാണ് അദ്ദേഹത്തെ ഏറ്റവും കൂടുതൽ പ്രചോദിപ്പിച്ച കാർ. ഈ ഒരു കാറിന്റെ ഡിസൈൻ കണ്ടാണ് അദ്ദേഹം തന്റെ സ്വപ്ന കാർ ഒരുക്കിയിരിക്കുന്നത്. അതും ഒരു പഴയ മാരുതി 800 കാറിനെ പരിഷ്കരിച്ചാണ് ഇത് നിർമ്മിച്ചിരിക്കുന്നത്.
ഈ കാറിന്റെ ഡോറുകളിലും പുറകിലത്തെ ഗ്ലാസിലും വശങ്ങളിലെ ചില്ലുകളിലും ബോണറ്റിലും സോളർ പാനലുകൾ പിടിപ്പിച്ചു. ഡോറുകൾ മുകളിലേക്ക് തുറക്കുന്ന രീതിയിലാണ് കാറിന്റെ ഡിസൈൻ.
