തിരുവനന്തപുരം: മുഖ്യമന്ത്രിയെ വിമാനത്തില്‍ വധിക്കാന്‍ ശ്രമിച്ചെന്ന കേസിലെ പ്രതികളായ രണ്ട്​ യൂത്ത്​ കോണ്‍ഗ്രസ്​ ​പ്രവര്‍ത്തകരെ രണ്ടു ദിവസത്തെ പൊലീസ് കസ്റ്റഡിയില്‍ വിട്ടു. ഈമാസം 23ന്​ വൈകീട്ട്​ അഞ്ചുവരെയാണ് കസ്റ്റഡി അനുവദിച്ച്‌​ തിരുവനന്തപുരം ജില്ല പ്രിന്‍സിപ്പല്‍ സെഷന്‍സ്​ കോടതി ഉത്തരവിട്ടത്​. കേസിന്‍റെ തുടര്‍നടപടികള്‍ക്കുള്ള അധികാരവും ഈ കോടതിക്ക്​ തന്നെയായിരിക്കുമെന്ന്​ ജഡ്​ജി ബാലകൃഷ്ണന്‍ പറഞ്ഞു.

കേസില്‍ ഗൂഢാലോചന നടന്നിട്ടുണ്ടെന്നും പ്രതികളെ ചോദ്യം ചെയ്യാനും വിമാനത്താവളത്തിലും വിമാനത്തിലും തെളിവെടുപ്പ്​ നടത്താനും ആറു ദിവസം കസ്റ്റഡിയില്‍ വേണമെന്നുമാണ്​ പ്രത്യേക സംഘം ആവശ്യപ്പെട്ടത്​. എന്നാല്‍, കോടതിയില്‍ നിന്ന്​ കിലോമീറ്ററുകള്‍ മാത്രം ദൂരെയുള്ള വിമാനത്താവളത്തില്‍ തെളിവെടുപ്പ്​ നടത്താന്‍ ആറു ദിവസം ആവശ്യമില്ലെന്ന വാദമാണ്​ പ്രതിഭാഗം ഉന്നയിച്ചത്​.

കേരള സ്പീക്ക്സിനെ പിൻതുടരാനും വാട്സ് അപ്പ് ഗ്രൂപ്പിൽ അംഗമാകാനും ഇവിടെ ക്ലിക്ക് ചെയ്യുക. Whatsapp Group | Google News |Telegram Group

വിമാനത്തിലെ അതിക്രമവുമായി ബന്ധപ്പെട്ട കേസ്​ പരിഗണിക്കേണ്ടത്​ എന്‍.ഐ.എ നിയമത്തിന്‍റെ അടിസ്ഥാനത്തിലാണെന്നും നിലവില്‍ കേസ്​ പരിഗണിക്കുന്ന കോടതിക്ക്​ അതിനുള്ള അധികാരമില്ലെന്നും പ്രതിഭാഗം വാദിച്ചു. ദേശീയ സുരക്ഷ നിയമത്തിന്‍റെ പരിധിയിലുള്ള കേസാണെങ്കിലും വിമാനത്താവള നിയമങ്ങള്‍ കൈകാര്യം ചെയ്യുന്ന കോടതി ജില്ലയില്‍ വേറെ ഇല്ലാത്തതിനാല്‍ ജില്ല സെഷന്‍സ്​ കോടതിക്കായിരിക്കും അധികാരമെന്ന്​ ഉത്തരവില്‍ പറയുന്നു.

പ്രതികളെ തുടര്‍പരിശോധനക്ക്​ വിധേയമാക്കുന്നതില്‍ വീഴ്ചയുണ്ടായെന്ന്​ പ്രതിഭാഗം കോടതിയെ അറിയിച്ചു. ഒന്നാം പ്രതി ഫര്‍സിന്‍ മജീദിനെ ഈ മാസം 17നും രണ്ടാം പ്രതി നവീന്‍കുമാറിനെ 20നും മെഡിക്കല്‍ കോളജിലെ സര്‍ജറി, ഇ.എന്‍.ടി വിഭാഗത്തില്‍ കൊണ്ടു പോകണമായിരുന്നു. എന്നാല്‍, പൊലീസ്​ വീഴ്ച വരുത്തി.

കഴിഞ്ഞ ദിവസം ഇക്കാര്യം കോടതിയെ ധരിപ്പിച്ചെങ്കിലും ജനറല്‍ ആശുപത്രിയില്‍ കൊണ്ടുപോയി മെഡിക്കല്‍ പരിശോധന നടത്തി സര്‍ട്ടിഫിക്കറ്റ് ഹാജരാക്കുകയായിരുന്നു. പ്രതികള്‍ക്ക് നീതി നിഷേധിക്കുകയാണെന്ന്​​ അഭിഭാഷകന്‍ വാദിച്ചു. ആവശ്യമായ ചികിത്സ നല്‍കാന്‍ പ്രോസിക്യൂഷന് കോടതി നിര്‍ദേശം നല്‍കി.

ഇവിടെ ക്ലിക്ക് ചെയ്ത് ഞങ്ങളുടെ യൂട്യൂബ് ചാനൽ സബ്സ്ക്രൈബ് ചെയ്യുക