തെന്നിന്ത്യൻ സിനിമ ലോകം ഏറെ പ്രതീക്ഷയോടെ കാത്തിരുന്ന ദിവസം വന്നിരിക്കുകയാണ്. ലേഡി സൂപ്പർസ്റ്റാർ നയൻതാരയും തമിഴിലെ സംവിധായകനുമായ വിഘ്നേശ് ശിവനും വിവാഹിതരായി എന്ന വാർത്ത ഇപ്പോൾ പുറത്തുവന്നിരിക്കുകയാണ്. തമിഴ് നാട്ടിലെ മഹാബലിപുരത്തെ ഷെറാട്ടൺ ഗ്രാൻഡ് ഹോട്ടലിൽ വച്ചായിരുന്നു താരനിബിഡമായി ഇരുവരുടെയും വിവാഹം നടന്നത്.
മലയാളം, തമിഴ്, തെലുങ്ക്, കന്നഡ, ഹിന്ദി സിനിമകളിലെ സൂപ്പർതാരങ്ങളും ഇരുവരുടെയും അടുത്ത ബന്ധുക്കളും പങ്കെടുത്ത ഒരു ബ്രഹ്മണ്ഡ വിവാഹമാണ് നടന്നിരിക്കുന്നത്. സൂപ്പർസ്റ്റാറുകൾ ഉൾപ്പടെ വരുന്നത് കൊണ്ട് തന്നെ വിവാഹവേദിയും പരിസരവും കനത്ത സുരക്ഷയിലാണ്. നയൻതാരയുടെ ബോളിവുഡ് അരങ്ങേറ്റ ചിത്രമായ ജവാനിലെ നായകനായ കിംഗ് ഖാൻ ഷാരൂഖ് ഖാനായിരുന്നു വിവാഹവേദിയിലെ പ്രധാന ആകർഷണം.
സ്റ്റൈലിഷ് ലുക്കിൽ വിവാഹത്തിന് എത്തിയ ഷാരൂഖിന്റെ ചിത്രങ്ങൾ സോഷ്യൽ മീഡിയയിൽ എങ്ങും വൈറലായി കഴിഞ്ഞിട്ടുമുണ്ട്. ഷാരൂഖിനെ കൂടാതെ രജനികാന്ത്, എം.കെ സ്റ്റാലിൻ, കമൽഹാസൻ, വിജയ്, അജിത്, കാർത്തി, ചീരഞ്ജീവി, മണിരത്‌നം, എ.എൽ വിജയ്, ബോണി കപൂർ, ദിലീപ് തുടങ്ങിയവർ ചടങ്ങിൽ എത്തിയതായി റിപ്പോർട്ടുകൾ പുറത്തുവന്നിട്ടുണ്ട്. ഇതിൽ പലരുടെയും ഫോട്ടോസും പുറത്തുവന്നിട്ടുണ്ട്.
നയൻതാരയുടെയും വിഘ്‌നേഷിന്റെയും ഫോട്ടോയോടൊപ്പം ഇരുവരുടെയും പ്രൊഡക്ഷൻ കമ്പനിയായായ റൗഡി പിച്ചേഴ്സിന്റെ ലോഗോയും അടങ്ങിയുള്ള ബോട്ടിലായിരുന്നു വിവാഹത്തിന് എത്തിയവർക്ക് വെള്ളം നൽകിയത്. അതുപോലെ താര വിവാഹത്തിന് അതിഥികൾക്ക് കഴിക്കാനുള്ള ഫുഡ് മെനുവിന്റെ വിവരങ്ങളും പുറത്തുവന്നിട്ടുണ്ട്. ഇരുപത്തിയേഴ് വെജിറ്റേറിയൻ ഡിഷെസാണ് മെനുവിലുള്ളത്.
വിഘ്നേശ് സംവിധാനം ചെയ്ത ‘നാനും റൗഡി താൻ’ എന്ന സിനിമയുടെ ഷൂട്ടിംഗ് സമയത്താണ് നയൻതാരയും വിഘ്‌നേഷും തമ്മിൽ പ്രണയത്തിലാവുന്നതും പിന്നീട് ഇരുവരും ഒരുമിച്ച് താമസിക്കുകയും ചെയ്തത്. അന്ന് മുതൽ തന്നെ ഇരുവരുടെയും വിവാഹത്തെ പറ്റി പല തവണ വാർത്ത വന്നിരുന്നു. ഇപ്പോൾ അത് ഔദ്യോഗികമായി സംഭവിച്ചിരിക്കുകയാണ്. മമ്മൂട്ടിയും മോഹൻലാലും ചടങ്ങിൽ പങ്കെടുക്കുമെന്നും റിപ്പോർട്ടുകൾ ഉണ്ടായിരുന്നു.
