പിണറായി നട്ടുനനച്ച പാഴ്മരങ്ങൾ: ക്രൈസ്തവ വോട്ടുകൾ ചാക്കിലാക്കാൻ പാളയത്തിൽ എത്തിച്ച ജോസ് കെ മാണിയും, കെ വി തോമസും ഇടതുമുന്നണിക്ക് ബാധ്യതയാകുന്നു.

കെ വി തോമസ് എന്ന മാൻഡ്രേക്ക്:

കോൺഗ്രസ് എന്ന രാഷ്ട്രീയ പ്രസ്ഥാനത്തിന്റെ കൂടെ നിന്ന് പതിറ്റാണ്ടുകളോളം, എംഎൽഎയും എംപിയും ആയി വിലസിയ ആളാണ് കെ വി തോമസ്. കേന്ദ്രത്തിലും കേരളത്തിലും മന്ത്രി പദവിയും ലഭിച്ചിട്ടുണ്ട്. 70 വയസ്സ് കഴിഞ്ഞപ്പോൾ പുതു നേതൃത്വത്തിന് പരിഗണന നൽകുവാൻ അദ്ദേഹത്തെ പാർട്ടി മാറ്റി നിർത്തുകയായിരുന്നു. എന്നാൽ ഈ അവസരം വിനിയോഗിച്ച് കെ വി തോമസ് എന്ന അത്യാഗ്രഹിയായ നേതാവിനെ കൂടെ കൂട്ടി നിർത്തി ലത്തീൻ വോട്ടുകൾ തന്നിലേക്ക് അടുപ്പിക്കാം എന്ന് പിണറായി കണക്കുകൂട്ടി. ഇതുകൊണ്ട് പക്ഷേ സംഭവിച്ചത് ഇടാമായിരുന്നു കുറെ വോട്ടുകൾ കൂടി നഷ്ടപ്പെട്ടു എന്നതാണ്.

പാളുന്ന സോഷ്യൽ എൻജിനീയറിങ്

സ്വന്തം മരുമകനായ മുഹമ്മദ് റിയാസിലൂടെ മുസ്ലിം സമുദായത്തെയും, ജോസ് കെ മാണിയിലൂടെ റോമൻ കത്തോലിക്കാ വിഭാഗത്തെയും, കെ വി തോമസിലൂടെ ലത്തീൻ കത്തോലിക്കാ വിഭാഗത്തെയും ചേർത്തുനിർത്തി ന്യൂനപക്ഷ ഏകീകരണമാണ് പിണറായി ലക്ഷ്യമിട്ടത്. അതി തീവ്ര മത ദ്രുവീകരണം സൃഷ്ടിച്ചെടുത്ത് അധികായൻ ആയി ഭരിക്കാനുള്ള മുഖ്യമന്ത്രിയുടെ മോഹങ്ങൾ കേട്ടാൽ തിരിച്ചടിയാണ് പക്ഷേ തൃക്കാക്കര ഫലം.

വിഡി സതീശനെ കടന്നാക്രമിക്കാൻ ചില ക്രിസ്ത്യൻ അല്മായ തീവ്ര സംഘടനകളെ പ്രോത്സാഹിപ്പിച്ചതും ബിജെപിയെ കാൾ ഉപരിയായി ഇടത് സൈബർ കേന്ദ്രങ്ങളാണ്. പോപ്പുലർ ഫ്രണ്ട് ഉയർത്തിയ ക്രൈസ്തവ ഹൈന്ദവ വിരുദ്ധ മുദ്രാവാക്യങ്ങൾക്ക് പോലും വിഡി സതീശനെ കടന്നാക്രമിക്കുകയാണ് ഇത്തരം ക്രിസംഘി ഗ്രൂപ്പുകൾ ചെയ്തത്. എന്നാൽ കലാപാഹ്വാനം നടത്തിയ വരോട് സർക്കാർ സ്വീകരിക്കുന്ന മൃദുസമീപനം ഇവർ കണ്ടില്ലെന്ന് നടിക്കുകയും ചെയ്തു. ഈ കാപട്യം തൃക്കാക്കരയിലെ മതേതര വോട്ടർമാർ തിരിച്ചറിഞ്ഞതും തങ്ങൾക്ക് പോലും താൽപര്യമില്ലാത്ത നേതാക്കളെ ക്രൈസ്തവ വിഭാഗ പ്രതിനിധികളായി ഉയർത്തി കാട്ടുവാൻ സർക്കാരും സിപിഎമ്മും നടത്തിയ ശ്രമങ്ങളും അവർക്ക് വിനയായി എന്ന് പറയേണ്ടിവരും.

കത്തോലിക്കാ വിഭാഗങ്ങളിൽ ജോസിനെക്കാൾ സ്വീകാര്യത പി സി ജോർജ്ജിന്:

തീവ്ര നിലപാടുള്ള ചില ന്യൂനപക്ഷ സംഘടനകളുടെ ഇടപെടലുകളെ സഭയും വിശ്വാസ സമൂഹത്തിൽ ഒരു വിഭാഗവും ആശങ്കയോടെയാണ് കാണുന്നത്. അവർക്കെതിരെ കടന്നാക്രമണം നടത്തുന്ന പി സി ജോർജ്ജിന് അതുകൊണ്ടുതന്നെ ചില വിഷയങ്ങളിൽ സഭയുടെ/ വിശ്വാസികളുടെ പിന്തുണയും ലഭിക്കുന്നുണ്ട്. എന്നാൽ ലൗജിഹാദ് ഉൾപ്പെടെയുള്ള വിഷയങ്ങളോട് പ്രതികരിക്കാതെ മുഖം തിരിഞ്ഞു നിൽക്കുന്ന ജോസ് കെ മാണി അധികാരത്തിനു വേണ്ടി മാത്രമാണ് തങ്ങളുടെ വക്താവ് ആകാൻ ശ്രമിക്കുന്നത് എന്ന തിരിച്ചറിവും ഈ വിഭാഗങ്ങളിൽ രൂപപ്പെടുന്നുണ്ട്.

ജോസ് കെ മാണിയെക്കാൾ പി സി ജോർജിനെ പിന്തുണയ്ക്കാൻ ആണ് അതുകൊണ്ടുതന്നെ ഈ വിഭാഗങ്ങൾക്ക് താൽപര്യവും. കേരളത്തിലെ രാഷ്ട്രീയ സമവാക്യങ്ങളിൽ യുഡിഎഫ് തന്നെയാവും കൂടുതൽ വിശ്വസിക്കാവുന്ന വിഭാഗം എന്ന് തൃക്കാക്കര തിരഞ്ഞെടുപ്പ് ഫലത്തോടെ ചില ക്രൈസ്തവ കേന്ദ്രങ്ങളിൽ വിലയിരുത്തലുകളും വരുന്നുണ്ട്. ഇതിന് പ്രധാനപ്പെട്ട ഒരു കാരണം മുസ്ലിം ലീഗ് പുലർത്തുന്ന മതേതര സ്വഭാവവും, ലീഗിനെ തളർത്താൻ ശ്രമിക്കുന്ന പോപ്പുലർ ഫ്രണ്ട് എസ്ഡിപിഐ പോലുള്ള സംഘടനകളുടെ അതിതീവ്ര ഇതര മതവിരുദ്ധ നിലപാടുകളുമാണ്. ഈ സംഘടനകളോട് സർക്കാർ സ്വീകരിക്കുന്ന മൃദു സമീപനവും പ്രധാനപ്പെട്ട ഒരു കാരണമാണ്