എരുമേലി: അമിത വേഗത്തിലെത്തിയ കാര് താഴ്ചയിലേക്ക് മറിഞ്ഞ് യുവാവ് മരിച്ചു. റാന്നി മക്കപ്പുഴ സ്വദേശി പ്ലാമൂട്ടില് സഞ്ജു തോമസ് (22) ആണ് മരിച്ചത്. എരുമേലി- പ്ലാച്ചേരി വഴിയില്, പ്ലാച്ചേരിക്കും മുക്കടയ്ക്കും ഇടയില് ചൊവ്വാഴ്ച രാവിലെ 11.30 മണിയോടെയാണ് അപകടം. സഞ്ജു ഓടിച്ചിരുന്ന കാര് 30 അടി താഴ്ചയിലേക്ക് മറിയുകയായിരുന്നു.
ഗുരുതരമായി പരിക്കേറ്റ സഞ്ജുവിനെ കാഞ്ഞിരപ്പള്ളി താലൂക് ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല. അമിത വേഗത്തില് വന്ന വാഹനം വഴിയോരത്തെ പോസ്റ്റില് ഇടിച്ച ശേഷമാണ് താഴ്ചയിലേക്ക് മറിഞ്ഞതെന്ന് പൊലീസ് പറഞ്ഞു.
ഓടിക്കൂടിയ നാട്ടുകാര് വിവരമറിയിച്ചതിനെ തുടര്ന്ന് മണിമല പൊലീസും, റാന്നിയില് നിന്നുള്ള ഫയര്ഫോഴ്സും സ്ഥലത്തെത്തി. ഏറെ നേരത്തെ പരിശ്രമത്തിനൊടുവിലാണ് വാഹനത്തിനുള്ളില് നിന്നും സഞ്ജുവിനെ പുറത്തെടുത്തതെന്നും പൊലീസ് വ്യക്തമാക്കി.