വളരെയധികം അസ്വസ്ഥതകള്‍ ഉണ്ടാക്കുന്നതും വേദനാജനകവുമായ അസുഖമാണ് മൂത്രനാളിയിലെ അണുബാധ (യൂറിനറി ട്രാക്‌ട് ഇന്‍ഫെക്ഷന്‍). ഇടയ്ക്കിടെ മൂത്രമൊഴിക്കാന്‍ തോന്നുക, മൂത്രമൊഴിക്കുമ്ബോള്‍ വേദന അനുഭവപ്പെടുക, ബ്ലീഡിംഗ്, നടുവേദന എന്നിവയെല്ലാം അണുബാധയുണ്ടാക്കുന്ന അസ്വസ്ഥതകള്‍ ആണ്. ഈ അസുഖം കൂടുതലും ബാധിക്കുന്നത് സ്ത്രീകളെയാണ്. കൃത്യസമയത്ത് ചികിത്സ നല്‍കിയില്ലെങ്കില്‍ അണുബാധ വൃക്കകളിലേയ്ക്കും പടരാന്‍ സാദ്ധ്യതയുണ്ട്.
വേനല്‍ക്കാലത്ത് അണുബാധ വര്‍ദ്ധിച്ചുവരുന്നതായി ആരോഗ്യവിദഗ്ദ്ധര്‍ പറയുന്നു. വെള്ളം കുടിക്കുന്നതിന്റെ അളവ് കുറയുന്നതാണ് ഇതിന് പ്രധാന കാരണമെന്ന് പൊതുവില്‍ പറയുമെങ്കിലും മറ്റ് കാരണങ്ങളാലും ഈ അസുഖം വരാം. കൂടുതല്‍ സമയം പുറത്ത് ചിലവഴിക്കേണ്ടിവരുന്നവര്‍ക്ക് വേനല്‍ക്കാലത്ത് നിര്‍ജ്ജലീകരണം ഉണ്ടാകുന്നത് അണുബാധയിലേയ്ക്ക് നയിക്കാം. ലൈംഗിക ബന്ധത്തിലേര്‍പ്പെടുന്നതും സ്ത്രീകളില്‍ മൂത്രനാളിയിലെ അണുബാധ ഉണ്ടാകുന്നതിന് മറ്റൊരു കാരണമാണ്. ആന്റിബയോട്ടിക്കുകള്‍ കൂടുതല്‍ കഴിക്കുന്നവരിലും അണുബാധയ്ക്കുള്ള സാദ്ധ്യത കൂടുതലാണ്.
എങ്ങനെ തടയാം
1.ധാരാളം വെള്ളം കുടിക്കുക: അണുബാധയ്ക്ക് കാരണമാകുന്ന ബാക്ടീരിയകളെ ശരീരത്തില്‍ നിന്ന് പുറന്തള്ളാന്‍ ധാരാളം വെള്ലം കുടിക്കുന്നതിലൂടെ സാധിക്കുന്നു.
2. ശുചിത്വ ശീലം: നല്ല ശുചിത്വ ശീലം പാലിക്കുന്നത് അണുബാധയെ തടയാന്‍ സഹായിക്കും.
3. ദീര്‍ഘനേരം മൂത്രം പിടിച്ചുനിര്‍ത്തരുത്: വെള്ളം കുടിക്കുമ്ബോള്‍ അതിനനുസരിച്ച്‌ മൂത്രമൊഴിക്കുകയും വേണം. അല്ലെങ്കില്‍ ശരീരത്തില്‍ ബാക്ടീരിയകളുടെ വളര്‍ച്ച കൂട്ടാന്‍ ഇത് കാരണമാകും. ശരീരത്തില്‍ എത്രസമയം മൂത്രം പിടിച്ചുവയ്ക്കുന്നുവോ അത്രയധികം അണുബാധ ഉണ്ടാകാനുള്ള സാദ്ധ്യതയും കൂടുതലാണ്.
4. ലൈംഗിക ബന്ധത്തിന് ശേഷം മൂത്രമൊഴിക്കുക: ലൈംഗിക ബന്ധത്തില്‍ ഏര്‍പ്പെടുമ്ബോള്‍ ഉണ്ടാവുന്ന ഘര്‍ഷണവും സ്രവങ്ങളും കാരണം, മൂത്രനാളിയുടെ ഉപരിതലത്തില്‍ കാണപ്പെടുന്ന സൂക്ഷ്മാണുക്കള്‍ മൂത്രനാളിയിലേക്ക് പ്രവേശിക്കാനുള്ള സാദ്ധ്യതയുണ്ട്, അതിനാല്‍ ലൈംഗിക ബന്ധത്തിന് ശേഷം മൂത്രമൊഴിച്ച്‌ സൂക്ഷ്മാണുക്കളെ പുറന്തള്ളേണ്ടത് പ്രധാനമാണ്.
5. ക്രാന്‍ബെറി ജ്യൂസ്: ക്രാന്‍ബെറി ജ്യൂസ് കുടിക്കുന്നത് മൂത്രനാളിയിലെ അണുബാധ തടയാന്‍ സഹായിക്കുന്നു. ക്രാന്‍ബെറിയില്‍ മൂത്രനാളിയിലേക്ക് ബാക്ടീരിയയെ എത്തുന്നത് തടയാന്‍ സഹായിക്കുന്ന പദാര്‍ത്ഥങ്ങളുണ്ട്, അതിനാല്‍ അണുബാധ തടയാന്‍ ഇത് സഹായിക്കുന്നു.
