തിരുവനന്തപുരം: ബാറിലുണ്ടായ തര്‍ക്കത്തെ തുടര്‍ന്ന് കൊലക്കേസ് പ്രതിയെ വാഹനമിടിച്ചു കൊലപ്പെടുത്തി. വള്ളക്കടവ് വയ്യാമൂല സ്വദേശിയായ സുമേഷിനെയാണ് വ്യാഴാഴ്ച രാത്രി കാറിടിച്ച്‌ കൊലപ്പെടുത്തിയത്. വാഹന അപകടമെന്ന സംശയത്തില്‍ തുടങ്ങിയ അന്വേഷണത്തിനൊടുവിലാണ് കൊലപാതകം തെളിഞ്ഞത്. കാറിലുണ്ടായിരുന്ന മൂന്നുപേരെ പൊലീസ് അറസ്റ്റ് ചെയ്തു.
വ്യാഴാഴ്ച രാത്രി പന്ത്രണ്ടരക്കു ശേഷമാണ് ചാക്ക ബൈപ്പാസിന് സമീപം അപകടമുണ്ടായത്. അപകടത്തില്‍ സുമേഷ് തല്‍ക്ഷണം മരിച്ചു. ഒപ്പമുണ്ടായിരുന്ന സൂരജിനെ ഗുരുതരമായി പരിക്കേറ്റു. വാഹനം അപകട കേസില്‍ പൊലീസ് അന്വേഷണം തുടങ്ങി. സിസിടിവി പരിശോധിച്ചപ്പോഴാണ് ഒരു കാര്‍ ബൈക്കിനെ ഇടിച്ചു തെറിപ്പിക്കുന്നത് കണ്ടത്.
അന്വേഷണം അപകടമുണ്ടായതിന് തൊട്ടടുത്ത ബാറിലേക്ക് നീങ്ങി. ഇന്നലെ രാത്രി 12 മണിക്ക് സുമേഷും മറ്റ് മൂന്നുപേരും തമ്മില്‍ ബാറില്‍ വച്ച്‌ തര്‍ക്കമുണ്ടായതായി പൊലീസ് മനസിലാക്കി. കാറും അതില്‍ സഞ്ചരിച്ച മൂന്നുപേരെയും പൊലീസ് കസ്റ്റിലെടുത്തു. നിഹാസ്, ഷെമീം, റെജി എന്നിവരാണ് കറിലുണ്ടായിരുന്നത്. നിഹാസാണ് കാറോടിച്ചിരുന്നത്. നിഹാസ് ഏതാനും ദിവസം മുമ്ബാണ് വിദേശത്തുനിന്നും വന്നത്.
മദ്യപിച്ചിറങ്ങുന്നതിനിടെ പ്രതികളും സുമേഷുമായി വാക്കു തര്‍ക്കമുണ്ടായി. സെക്യൂരിജീവനക്കാര്‍ ഇടെപെട്ട് ഇവരെ പുറത്തേക്കയച്ചു. പക്ഷെ പ്രതികള്‍ കാറില്‍ കാത്തിരുന്നു. സുമേഷും സുഹൃത്തും ബൈക്കില്‍ പോയപ്പോള്‍ പിന്തുടര്‍ന്ന് ഇടിച്ചു തെറിപ്പിച്ചുവെന്നാണ് പൊലീസ് പറയുന്നത്. പ്രതികളെ ഇന്ന് കോടതിയില്‍ ഹാജരാക്കും.
മദ്യപിക്കുന്നതിനിടെ ഉണ്ടായ തര്‍ക്കത്തിനിടെ സുഹൃത്തായ അനുപിനെ തലക്കടിച്ച്‌ കൊലപ്പെടുത്തിയ കേസില്‍ ഒന്നാം പ്രതിയാണ് കൊല്ലപ്പെട്ട സുമേഷ്. മറ്റ് ചില ക്രിമിനല്‍ കേസിലും പ്രതിയാണ് സുമേഷ്. ബാറിന്‍റെ പ്രവര്‍ത്തന സമയം കഴിഞ്ഞിട്ടും മദ്യം നല്‍കിയതിനെ കുറിച്ചും അന്വേഷിക്കുന്നുണ്ട്.
