പറവൂര്‍: ലക്ഷങ്ങള്‍ വിലമതിക്കുന്ന മാരക മയക്കു മരുന്നുമായി യുവതി അടക്കം മൂന്നുപേര്‍ പിടിയിലായി. പറവൂര്‍ എക്സൈസ് സര്‍ക്കിള്‍ ഇന്‍സപെക്ടറുടെ നേതൃത്വത്തില്‍ പറവൂര്‍, ആലങ്ങാട് ഭാഗങ്ങളില്‍ നടത്തിയ റെയ്ഡില്‍ പടിഞ്ഞാറേ വെളിയത്തുനാട് അക്വ സിറ്റി ആല്‍പെയ്ന്‍ ഫ്ലാറ്റ് സമുച്ചയത്തിന്റെ സമീപത്തു നിന്നാണ് ഇവരെ പിടികൂടിയത്.
ലക്ഷങ്ങള്‍ വിലമതിക്കുന്ന എം.ഡി.എം.എ, ഹഷീഷ് ഓയില്‍ എന്നിവ ആഡംബര കാറില്‍ കടത്തിക്കൊണ്ടുവന്ന പെരുമ്ബാവൂര്‍ വല്ലം ഉളവങ്ങാട് വീട്ടില്‍ ബിജു (43) എന്നയാളെ പിടികൂടുകയും തുടരന്വേഷണത്തില്‍ നെടുമ്ബാശ്ശേരിയിലെ ഫ്ലാറ്റില്‍നിന്ന് മാള വലിയപറമ്ബ് പാറേപ്പറമ്ബില്‍ ഷെബിന്‍ ഷാജഹാന്‍ (30 ), കൊടുങ്ങല്ലൂര്‍ ചെന്ത്രാപ്പിന്നി എറിയാട്ട് വീട്ടില്‍ സിന്ധു (38) എന്നിവരെ മയക്കുമരുന്ന് കൈമാറിയതിനും കൈവശം വെച്ചതിനും അറസ്റ്റ് ചെയ്തു.
ടാക്സി ഡ്രൈവറായ ഷെബിന്‍ ഷാജഹാന്‍ ബംഗളൂരു, ഗോവ എന്നിവിടങ്ങളില്‍നിന്ന് മയക്കുമരുന്ന് കേരളത്തില്‍ എത്തിച്ചാണ് ആവശ്യക്കാര്‍ക്ക് വിതരണം ചെയ്തിരുന്നത്. ഈ കേസുമായി ബന്ധപ്പെട്ട് മൊബൈല്‍ ഫോണ്‍, ബാങ്ക് അക്കൗണ്ട്, ഗൂഗിള്‍ പേ എന്നിവ കേന്ദ്രീകരിച്ച്‌ തുടര്‍ അന്വേഷണം ആരംഭിച്ചു. എക്സൈസ് ഉദ്യോഗസ്ഥരായ എസ്. നിജുമോന്‍, വി.എം. ഹാരിസ്, വി.എസ്. ഹനീഷ്, സിജി ഷാബു, ബിനു മാനുവല്‍, എം.ടി. ശ്രീജിത്ത്, പി.യു. നീതു, കെ.കെ. കബീര്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.
