തിരുവനന്തപുരം: ചോദ്യം ചെയ്യലിനായി എന്ഫോഴ്സ്മെന്റ് ഡയറക്ടറേറ്റിന് മുന്നില് ഹാജരാകുമെന്ന് സ്വര്ണക്കടത്ത് കേസ് പ്രതി സ്വപ്ന സുരേഷ്. കേന്ദ്ര ഏജന്സികളുടെ ചോദ്യങ്ങള്ക്ക് സത്യസന്ധമായി ഉത്തരം നല്കുമെന്നും എന്നാല് ഔദ്യോഗികമായി ഇഡിയുടെ അറിയിപ്പ് ലഭിച്ചിട്ടില്ലെന്നും മൊഴി നല്കിയ ശേഷം മാധ്യമങ്ങളെ കാണുമെന്നും സ്വപ്ന സുരേഷ് പറഞ്ഞു.
എന്ഫോഴ്സ്മെന്റ് ഡയറക്ടറേറ്റ് വിളിച്ചത് എന്തിനെന്ന് വ്യക്തമല്ല. മാധ്യമങ്ങളിലൂടെയാണ് മൊഴിയെടുക്കും എന്ന വിവരം അറിഞ്ഞത്. താന് തെറ്റായ ഒന്നും പറഞ്ഞിട്ടില്ല.
ശിവശങ്കറിനെയും പുസ്തകത്തെ കുറിച്ചുമാണ് ചോദിക്കുന്നതെങ്കില് അറിയുന്നത് എല്ലാം പറയുമെന്നും സ്വപ്ന മാധ്യമങ്ങളോട് പ്രതികരിച്ചു. സ്വര്ണ്ണക്കടത്ത് കേസിലെ പുതിയ വെളിപ്പെടുത്തലിന്റെ അടിസ്ഥാനത്തിലാണ് ഇഡി സ്വപ്നയ്ക്ക് നോട്ടീസ് നല്കിയത്. നാളെയാണ് സ്വപ്നയുടെ മൊഴി അന്വേഷണ ഏജന്സി രേഖപ്പെടുത്തുക.