മലപ്പുറം: കൊണ്ടോട്ടിയില് ഇരുപത്തിയൊന്നുകാരിയായ വിദ്യാര്ത്ഥിനിയെ ആക്രമിച്ച് പീഢിപ്പിക്കാന് ശ്രമിച്ച കേസില് പതിനഞ്ചുകാരന് പിടിയില്. പെണ്കുട്ടിയുടെ നാട്ടുകാരനായ സ്കൂള് വിദ്യാര്ഥിയാണ് പിടിയിലായതെന്നു പൊലീസ് അറിയിച്ചു. ചോദ്യം ചെയ്യലില് വിദ്യാര്ത്ഥി കുറ്റംസമ്മതിച്ചതായി പൊലീസ് പറഞ്ഞു.
പ്രതിയെ ജുവനൈല് ജസ്റ്റിസ് ബോര്ഡിന് മുമ്പാകെ ഹാജരാക്കും. പ്രായപൂര്ത്തിയാകാത്തതിനാല് നേരിട്ട് കോടതിയില് ഹാജരാക്കാനാവില്ലെന്ന് മലപ്പുറം എസ്പി എസ് സുജിത് ദാസ് പറഞ്ഞു. പ്രതി ജൂഡോ ചാമ്പ്യനാണെന്നും അദ്ദേഹം പറഞ്ഞു.
പ്രദേശത്തെ സിസിടിവി ദൃശ്യങ്ങള് പരിശോധിച്ച് നടത്തിയ അന്വേഷണത്തിലാണ് പതിനഞ്ചുകാരന് പിടിയിലായതെന്നാണ് വിവരം. മീശയും താടിയും ഇല്ലാത്ത വെളുത്ത് തടിച്ച ആളാണ് അക്രമിച്ചതെന്ന് യുവതി മൊഴി നല്കിയിരുന്നു. അന്വേഷണത്തിനൊടുവില് പ്രതിയെ പൊലീസ് വീട്ടിലെത്തി പിടികൂടുകയായിരുന്നു.
തിങ്കളാഴ്ചയാണ് യുവതിക്ക് നേര്ക്ക് ആക്രമണമുണ്ടായത്. പഠന ആവശ്യത്തിനായി പോകുമ്പോള് പ്രതി തന്നെ കടന്നുപിടിക്കുകയും ഒഴിഞ്ഞ പ്രദേശത്തേക്ക് വലിച്ചിഴച്ച് കൊണ്ടുപോയി പീഡിപ്പിക്കാന് ശ്രമിക്കുകയുമായിരുന്നെന്ന് യുവതി മൊഴി നല്കിയതായാണ് വിവരം. പീഡനശ്രമം ചെറുത്തപ്പോള് പ്രതി യുവതിയെ കല്ലുകൊണ്ട് ഇടിച്ചു പരുക്കേല്പ്പിക്കുകയും ചെയ്തിരുന്നു.
ഓടി രക്ഷപ്പെട്ട യുവതി സമീപത്തെ ഒരു വീട്ടിലെത്തി വിവരം പറയുകയായിരുന്നു. തുടര്ന്ന് യുവതിയെ ആശുപത്രിയിലേക്ക് മാറ്റുകയും ചെയ്തു. ഇന്നലെ സംഭവം നടന്നതിന് പിറകെ പ്രദേശത്ത് തിരച്ചില് നടത്തിയിരുന്നെങ്കിലും പ്രതിയെ കണ്ടെത്താന് കഴിഞ്ഞിരുന്നില്ല.